Meeqqat qulit aningaasanik taarsiivigineqassapput

Nuummi meeqqanik kinguaassiutaatigut atornerluisoqarsimaneranik suliaq naammassingajalerpoq. Meeqqallu taakku katillugit 20-t missaanniittut akornanni meeqqat qulit pinerluffigineqarsimasut taarsiiffigitinnissaannik aalajangiisartoqatigiinnit aningaasanik taarsiivigineqartussanngorput.

Nuummi meeqqat arlalippassuit kinguaassiutaatigut atornerluisoqarsimaneranik suliaq naammassineqangajalerpoq, pasineqartorlu parnaarussaatilluni upernaaq imminorpoq. Nuummi politimesteri Bjørn Bay naapertorlugu suliap naammassineqarnissaanut apersorneqartussaq ataasiinnaq kisiat amigaatigineqarpoq.

- Misissuinerput naammassiliivipparput, uppernarsaasussarlu ataasiinnavik kisiat amigaatigaarput. Taamaalioreerutta meeqqat suliamut attuumassuteqartut taakkulu ilaqutaat ilisimatinneqassapput suliaq uagut isumagigallassagipput pasineqartup toqukkut qimagutereersimanera tunngavigalugu, Nuummi politimesteri Bjørn Bay taama nassuiaavoq.

Taanna nangilluni nassuiaavoq, taamatut nalunaaruteqartariaqarlutik inuit suliamut attuumassuteqartut susoqarsimaneranik iluamik ilisimatinneqarnissartik pisinnaatitaaffigigaat taamatuttaaq tamanna aamma qulakkeerluarneqartariaqarmat.

Meeqqat niviarsiaraanerusut aqqaneq-marlut missaanni ukioqartitertut 20-t missaanniittut pineqarput, Nuup kommunialu naapertorlugu taakkunannga qulit pinerluffigineqarsimasut taarsiiffigitinnissaannik aalajangiisartoqatigiinnit aningaasanik taarsiivigineqassapput. Aningaasallu taakku amerlassusaat Bjørn Bay-ip uppernarsarsinnaannginnerarpaa, erseqqissarpaali upernaap ingerlanerani suliamik misissuinerminni politeeqarfik ilisimatitsisimammat pineqartut taarsiivigineqarnissaminnik qinnuteqarsinnaasut.

- Taarsiissutissanut tunngatillugu imatut uppernarsaasinnaavallaanngilanga, oqarsinnaavungali aningaasat 30.000-t 80.000 koruunillu akornanni ilaqutaasunut taarsiissutigineqassammata, Bjørn Bay oqarpoq.

Taanna erseqqissaavoq aningaasat amerlassusaat politiit aalajangigarinngimmassuk aalajangiisartoqatigiilli tamanna aalajangigarimmassuk