Meeqqat qalipakkaminnik Katuami saqqummersitsisut

Juunip aallaqqaataat Naalagaaffiit Peqatigiit nunarsuaq tamakkerlugu meeqqanut ulloritippaat. Nuummi kulturip illorsuani Katuami meeqqat meeqqerivinniit Mikisumeersut Sulunnguameersullu titartakkaminnik saqqummersitsipput.

-Ukiup kingulliup ingerlanerani meeqqat assigiinngitsunik suliaqaqattaarsimapput. Ataasiarlutik eqqumiitsuliortoq Laila-mik atilik sapaatip akunnera atuartitsisorisimavaat. Nivingapput nannut qalipataat, qalipakkallu allat tassaapput sequnngerlutik imminnut qalipataat. Meeqqat aalajangersimasumik sammisaqartinneqartarnerat nuannarisartorujussuuaat, ulluinnarnilu qalipaaqqittarnissaminnut iluaqutigisaraat malunnartarpoq, Air Greenlandip meeqqeriviani meeqqerisoq Nina Motzfeldt oqaluttuarpoq.

Meeqqat Katuami saqqummersitaat kusanarluinnartuupput qalipaasersorluagaallutik. Meeqqerivimmi Sisi-meersut meeqqat saqqummersitaat alakkarpaat, klovnitut atisalersorsimallutik.

-Ullumi Sisi-mi fiistissamaarpugut, qittallutalu nerrisissaagut. Meeqqat qalipagaat kusanarput, Monica arfinilinnik ukiulik ittoorluni oqaluttuarpoq.

Atuartut allagartarsualerlutik Katuaq saneqqullugu aamma angalaaqatigiipput, taakkulu oqariartuutigaat meeqqat paarilluarneqassasut asaneqassasullu.