Meeqqaruit arpannerlu nuannarigukku, ataasinngorpat arpaqataasinnaavutit. Illoqarfinni ukunani arfineq marlunni arpaqatigiittoqassaaq: Nuuk, Tasiilaq, Qaqortoq, Sisimiut, Ilulissat, Aasiaat Qaanaarlu.
Arpaffissat 2 kilometerisut isorartutigisapput, arpatussallu nalunaaqutaq tallimanut aallassapput.
Qalipaatilimmik arpanneq tassaavoq, peqataasut qalipaatinik assigiinngitsunik qummut ataatsikkut milorujusseriarlutik, qalipaatinik tuffigineqariarlutik, arpaqatigiinneq aallartittaraat.
Nakuusap pilersinneqarnerminik aggustip 31-ani 2020-mi ukiut qulinngortorsiussaaq. Tassami Namminersorlutik Oqartussat UNICEF-ilu suleqatigiinnissamut isumaqatigiissusioqqaarneranniit ukiut qulinngussapput.
-Aaqqissuussinitsinni ingammik meeqqat inuusuttullu nuannersumik misigisaqartinneqarnissaat siunertaraarput”, Mia Skifte Lynge, NAKUUSA-mi ingerlatsinermut aqutsisoq tusagassiuutinut nalunaarummut oqarpoq.
Meeqqat atugaasa pisinnaatitaaffiisalu pitsanngorsaaffigineqarnissaat Nakuusap anguniagaraa. Taamaattumik meeqqat pisinnaatitaaffiinik inuillu assigiinngiaarnerinut ataqqinnissuseqalernissaq erseqqissarusullugu qalipaatilimmik arpaqatigiisitsisoqarniarpoq.
COVID-19-ili pissutaalluni peqataasut amerlassusissaat killilersorneqassaaq. Illoqarfinni arpaffiusuni peqasaasussat amerlanerpaamik 250-iusartussaapput.
Illoqarfinni arpaffiusussani paasissutissanik facebookikkut allattoqarnikuuvoq. Paasisaqarnerorusukkuit www.nakuusa.gl iserfigalugu paasissutissaqarpoq.