Meeqqat pujortartut amerliartuinnaratik aamma pujortaliaarnerusalerput
Juullinngitsiartoq radioavis-imi oqaluttuaraarput Kangillinnguit Atuarfianni 7.b-mi atuartut, Paarisap unammisitsinerani ” Atuaqatigiit pujortartanngitsut ”-tut 20.000 koruuninik akissarsitinneqartut.
Meeqqalli pujortartartut amerliartuinnaratik aamma siusinnerusukkut pujortalertarnerat malunnartoq, Nuup Kommuniani pinaveersartitsinermik siunnersortip Line Dalentoft-ip oqaatigaa:
- Oqarsinnaavunga meeqqat pujortartarnerat pujortartaliaartarnerallu ukiuni kingullerni annertusoq aamma erseqqarinnerulersimanera misissuisarnerit takutippaat, Line Dalentoft oqarpoq.
Line Dalentoft oqarpoq meeqqat arfineq pingasuniit ukiullit pujortartartut naammattoortarlugit.
- Meeqqat oqaloqatigisarnerisigut paasinarsivoq angajoqqaaminnut pujortartarnertik isertuuttaraat; kisianni aamma ajoraluartumik angajoqqaaminnik akuerineqarlutik pujortartartut naammattoortarpavut.
Paarisap meeqqat pujortartarneranik misisuisitsisimaneranni erserpoq inuusuttuaqqat 14- 17 inik ukiullit quliugaangata inuusuttuaqqat sisamat pujortartartuusartut.
WHO-ip 94- miit 2002 nunatsinni meeqqat pujortartarnerannik misissuisitsineranni aamma erserpoq meeqqat aqqaniliinniit 15-nut ukiullit 50 procentii sapaatip akunneranut ataasiarlutik arlaleriarlutilluunniit pujortartartut.
Line Dalentoft oqarpoq meeqqat pujortaliaartarnerat peqqisutsikkut annertuumik ajoqusiisinnaasoq:
- Peqqisutsikkut inuttullu atugarisatigut meeqqat pujortartaliaartarnerat ajoqusiisinnaavoq,meeqanut pujortartaliaaartanngitsunut naleqqiullugu, soorlu napparsimakulalernikkut aammalu kingusinnerusukkut puallulernikkut imaluunniit taqatigut nappaateqalernikkut, Line dalentoft oqarpoq.
Line Dalentoft isumaqarpoq meeqqat ujortartalinnginnissaa anguniassagaanni angajoqqaat maligassiuilluartariaqartut:
- Angajoqqaat meeqqatik pujortartarnerup ulorianaataat pillugit oqaloqtigiissuteqartarnikkut, pujortartarnerup ulorianaataanik oqaloqatigiissuteqarnikkut aammalu meeqqat isersimaffigisaanni pujortartannginnikkut meeqqat pujortartalinnginnissaat anguniarneqarsinnaavoq, Line Dalentoft oqarpoq.
Paarisap mississusitsinerani erserpoq meeqqat pujortartartut kallaalisut oqaasillit sisamararterutaasa pujortartarnerup ulorianassusia ilisimanngikkaat.
Meeqqat ilisimasaqannginnerisa ersersippaat pujortartarnerup ulorianassusiata qaammaarsaavigineqartuarnissaa pingaaruteqartoq.
