Meeqqat pujortartartunik pujortarunnaaqqusillutik oqariartuuteqarput
Pujortarunnaaritsi! Taama oqariartuuteqarput Nuummi Kangillinnguit atuarfianni 7.b-mi atuartut, "Atuaqatigiit pujortartanngitsut 2005”-mimi Paarisap unammisitsinerani klassitut ajugaasut.
-Paasinikuuara tupa timimut ajoqutaasoq, timimilu assigiinngitsunik aseruisartoq, soorlu aamma naartusut naartui mikinerusartut paasinikuuara. Angajoqqaakka pujortartarneq pillugu oqaluukkaangakkit oqartarput uagut pujortartalissanngitsugut, ajoqutaammat uninnaveernarlunilu, Nuka oqaluttuarpoq.
Atuaqataata Sikkip pujortartarneq ajoqutaasoq aamma paasilluarsimavaa:
-Pujortartarneq iluaqutaanngilaq ajoqutaaginnarpoq, soorlu napparsimalersitsisinnaavoq akissaajaataaginnarlunilu. Arlaleriarlunga angajoqqaakka oqarfiginikuuakka pujortarunnaaqqullugit, akisarpullu misilikkumaarlugu, Sikki oqaluttuarpoq.
Kangillinnguit Atuarfianni klassit arlallit atuarfimminnit Nuup illoqarfiata qeqqanut nalunaaqutaq ataatsinut angalaaqatigiissapput, atuaqatigiillu angalaaqatigiinnissaminnut allagartarsualiorlutik piareersaleruttorput.