Meeqqat pujortarnaveersaartut

Paarisap pujortartannginnissaq anguniarlugu siniariak tamakkerlugu meeqqanut atuartunut unammisitsinera novembarip 30-ianut killeqarpoq. Atuartorpassuillu pujortartannginnissaq anguniarlugu suliniutaat assigiinngitsorpassuupput. Atuartut ilaat assilialiorrapput, ilaat bussit unittarfiinut nivinngaasimallutik allallugu pujortarneq navianartuusoq. Atuartut ilaat Nuummi Kangillinnguaneersut isiginnaagassiorsimapput, pujortarnerup navianaqutaanik oqaluttuartumik:

Kangillinnguit Atuarfianni atuartut 7.B-it ullumi taama ilaatigut isiginnaartitsipput. Ilinniartitsisuat Cecilie Vahl ima oqarpoq:

- Paarisap unammisitsinerani peqataavugut qulequtaralugu ”taamaattumik pujortartalerusunngilanga”. Kangillinnguani 7.B-t Nuummi borgmesterimut allagaqarsimapput kissaatigalugu Majip sisamaat nunarsuaq tamakkerlugu pujortarnaveersaarfiusartoq, Nuup illoqarfiani malunnarnerunissaa kissaatigalugu.

Atuartut isiginnaagassiorsimasut ilinniartitsisuat Cecilie Vahl taama oqarpoq.

Atuartut unammeqataasut ilaasa suliatik pillugit nassuiaammik nassitsereersut, Paarisap unammisitsinermut ataqatigiissaarisua Sofie Jessen oqarpoq. Pujortartannginnissaq anguniarlugu unammisitsinermut sinerissami atuaqatigiit katillutik 30-it peqataapput.

Pujortartarnermut akiuiniarluni unammisitsisarneq siorna aallartippoq, ukioq mannalu unamminermi ajugaasut decembarip qeqqata missaani nalunaarutigineqassapput.