Meeqqat pujortarfigineqarpallaarunnaaramik peqqissiartulerput

- Danmarkimi ukiut tamaasa meeqqat 2.000-it missaat pujormiutinneqartarnertik pissutigalugu napparsimmavinnut unitsinneqartarput. Taakkua ikilisinniarlugit napparsimmavimmi Lillebæltimi Koldingimiittumi iliuuseqarlutik, meeqqanut immikkoortortami akisussaasuusoq, peqqissaasoq Karin Bundgaard oqarpoq.

- Suliniutitsinni angajoqqaat pujortartarunnaarnissaat suliniutiginngilarput. Iliuuseqarfigerusutarput tassaavoq, angajoqqaat meeqqatik ilagitillugit pujortartarnerat, Karin Bundgaard oqarpoq.

Ukiuni kingullerni marlunni napparsimmavimmi Lillebæltimi angajoqqaat pujortartartut meeqqaminnik napparsimasumik uninngaqateqartut oqaloqatigineqartarput. Napparsimmavimmi sulisunit angajoqqaat oqaloqatigineqartut tuusintit missaanniittut, 15 procentiisa missaat pujortartarnerminni ileqquminnik allanngortitsipput tamannalu meeraannut iluaqutaavoq.

- Angajoqqaat pujortartarnerminnik allannguinerat meeqqat ingerlaannartumik malugisarpaat. Angajoqqaat silami pujortartaleraangata meeqqat anersaartuutimikkut nappaateqartut ikileriarnerat malugisinnaasarparput, Karin Bundgaard oqarpoq.

Siusinnerusukkut meeqqat pujormiunertik pissutigalugu napparsimmavimmut unitsinneqartartut 200-t imaluunniit 300-t missaanniittaraluartut maanna 50-it missaannaanniilersimasut, meeqqanut immikkoortortami peqqissaasut pisortaat Gurli Sørensen oqarpoq.

Maani Paarisa quppersakkamik saqqummersitsinikuuvoq, taaguutilimmik “Puaat minguitsut – aammalu – meeqqat pujortarfiginagit”. Tassaniipput ilaqutariit pujormiuffiunngitsumik angerlarsimaffeqarnissaannut siunnersuutit pitsaasut. Kisitsisit kingulliit takutippaat nunatta inuisa 66 procentii pujortartartuusut.