Meeqqat pisinnaattaaffii pillugit ombudsmandit naapipput
Taakku Nunatsinni Meeqqat Pisinnaatitaaffii pillugit ombudsmandimit, Aaja Chemnitz Larsenimit ullumi tikilluaqquneqarlutik.
Ukiumoortumik ataatsimeersuarnissaq aggustip 25-ata tungaanut ingerlanneqassaaq.
Nunatsinni Meeqqat Pisinnaatitaaffiinik suliniaqatigiiffik, MIO 2012-imi pilersinneqarmalli, Nunani Avannarlerni suliniaqatigiiffinnut ilannguppoq ukiullu tamaasa naapeqatigiinnermut peqataasalerluni.
Ukioq manna ataatsimeersuarnermi qulequtarineqarpoq, 'Meeqqanut ulorianartorsiortunut ataatsimoorluni suleqatigiinneq'. Tamannalu Naalagaaffiit Peqatigiit Meeqqat pillugit Ataatsimiititaliarsuani, nunat peqataasut suliaminnik ingerlatsinerannik nakkutilliilluni misissuinissamut kiisalu inuiaqatigiinni aalajangiisartullu akornanni meeqqat pisinnaatitaaffii pillugit maluginiarneruneqarnissap annertunerulersinnissaanut periarfissanik tamakkiisunik pilersitsinissaq siunertarineqarluni.
AAMMA ATUARUK Meeqqat illersuisuata eqqarsartaaseq allangortikkusuppaa
Ataatsimeersuarnermi meeqqanik sullissisut meeqqallu arlallit peqataassapput, taakkununnga ilanngullugit meeqqat ulloq unnuarlu angerlarsimaffinni najugaqartut.
Ilulissani ataatsimeersuarnerup kingorna tassani peqataasut ilaat Nuummukassapput, tassani isumasioqatigiinnermut peqataassallutik. Isumasioqatigiinneq taanna, Nunani Avannarlerni Meeqqanik Naalliutsitsinermut Sumiginnaanermullu Akerliunermut Peqatigiiffiup, NFBO-p aaqqissuusaanut peqataassallutik.
