Meeqqat pisinnaatitaaffii pillugit paasisitsiniaaneq
- Namminerisatsinnik inigisarput aaqqissuullugu naleqanngilaq. Atuarfimmi qanoq pisoqarnissaa aalajangeeqataaffigisinnaallugu tassa torrak.
Taama oqaluttuarput kalaaliaqqat UNICEF Danmarkip meeqqat nammineq pisinnaatitaaffitik qanoq isumaqarfigineraat misissuinerani.
Misissuinermi aammattaaq paasinarsivoq nunani avannarlerni allani meeqqat inigisamik aaqqissuunnissaa atuarfimmilu oqartussaaqataaneq pingaartikkaat, taamaalillutillu kalaaliaqqat nunani avannaamioqatimissulli inissisimallutik.
Kalaaliaqqat tamatuma saniatigut nunani avannarlerni inuusuttuaqqanut naleqqiullugit atuarfinni suliniaqatigiiffinni naalakkersuinikkullu partiini peqataanerupput. Kalaaliaqqalli akerlianik meeqqat pisinnaatitaaffii pillugit ilisimasamikkut kinguarsimanerupput. Tamannalu iliuuseqarfigineqartariaqartoq UNICEF isumaqarpoq.
Sapaatip-akunnerata tulliani tamanna pillugu UNICEF aamma Namminersorlutik Oqartussat suleqatiginnissamik isumaqatigiissuteqassapput ilaatigut meeqqat pisinnaatitaaffii pillugit paasisitsiniaanermik nutaamik nassataqartussamik.
- Meeqqat inersimasullu akornanni meeqqat pisinnaatitaaffiinut ilisimasat siammarterneqarnissaat pisariaqarpoq. Qularinngilara suleqatigiinnermi meeqqat pisinnaatitaaffimminnik eqqunngitsuliorfigineqartartut ikiliumaartut, isumaginninnermut naalakkersuisoq Maliina Abelsen oqarpoq.
