Meeqqat pisinnaatitaaffii pillugit allaffik pisortartaarpoq

Meeqqat illersuisuat Aaja Chemnitz Larsen aalajangerpoq cand.scient, Ph.D Lone Nukaaraq Møller Kalaallit Nunaanni meeqqat pisinnaatitaaffiata allaffiani pisortatut atorfinitsinniarlugu. Pisortanngortoq meeqqanik inuusuttunillu sullissinermi misilittagaqarluarpoq.
Allattoq Noah Mølgaard
maajip 24-at 2012 07:50

Lone Nukaaraq Møller ilisimatusarnermik suliaqarsimasoq meeqqat inuusuttullu pisinnaatitaaffii pillugit suliaqartareerpoq. Lone Nukaaraq Møller siornatigut innuttaasut peqqissuunissaat pillugu suliniummi Inuunerittami Paarisap ingerlataani suleqataasimavoq. Maanna aamma atorfigisamini Ilinniartitaanermut Ilisimatusarnermullu pisortaqarfimmi meeqqat inuusuttullu atugaat pillugit suliaqarpoq ilinniartitaanerlu ilisimasaqarfigilluarlugu.

- Lone tunuliaquteqarpoq ilisimatuutut misissueqqissaartartutut, kisianni atorfinitsitsiniarnermi immikkuullarissumik ataqatigiissitsisinnaasutut takutitsivoq suliassanut inuttullu piginnaaneqarluartutut. Ilinniagaqarluartuusimanerata saniatigut qiviaraanni inooqatigiinnut pimoorussilluni meeqqat inuusuttullu atugarisaat pillugit ilumoorussillunilu nutaaliornissamik isumaliuutersuuteqarpoq, meeqqat illersuisuat Aaja Chemnitz Larsen oqarpoq.

Atorfiup inuttassarsiornissaa sioqqullugu atornitsitsinermi suleqatigiit pilersinneqarput meeqqat illersuisuata saniatigut meeqqat pisinnaatitaaffii pillugit Kalaallit Nunaanni suliniartunit marluk peqaatinneqarlutik. Aamma naalakkersuisutigoortuunngitsumik suliniartut tassani suleqataaneranni NanuBørnimiit Krissie Winberg suleqataavoq.

- Nuannaarutigaarput iliuusissat pilersaarutitta tunuliaqutitsinneereersut ilanngunneqarnissaat taamatullu NGO-t suleqatigilernissaat, taakkuummatami suleqatissagut uagutsinnut qaninnerpaajusussat, meeqqat illersuisuat Aaja Chemnitz Larsen oqarpoq, taassumalu qilanaarinerarpaa Lone Nukaaraq Møllerip aggustip qeqqani sulilernissaa.