Meeqqat pisinnaatitaaffii nittarsaanneqassapput

MIO-p KNI Pilersuisoq A/S-illu suleqatigiillutik meeqqat pisinnaatitaaffiisa nunatsinnut tamarmut paasititsiniutiginissaat qulakkeerniarpaat. MIO ilisimasanik siammarterissaaq KNI Pilersuisullu nuna tamakkerlugu attaveqarfini atorlugit pisinnaatitaaffiit pillugit ilisimasanik siammarterissaaq.
septembarip 03-at 2013 07:06

Puussiat, allagartarsuit meeqqallu pisinnaatitaaffii pillugit paasititsiniaanermi atortut allat aqqutigalugit suleqatigiit marluusut nuna tamakkerlugu siammarteriniarput. Tamatuma saniatigut ullut aalajangersimasut pillugit, soorlu Meeqqat ulluat juunip aallaqqaataa aamma Naalagaaffiit Peqatigiit meeqqat pillugit isumaqatigiissutaata ulluanut novembarip ulluisa 20-anni malunnartitsinerit aaqqissuunneqartassapput. 

- Suleqatigiinnissarput meeqqat pisinnaatitaaffii pillugit ilisimasassanik avammut inuiaqatigiinnut tamanut – ingammik meeqqanut siaruarterinissamut pingaaruteqarpoq. MIO-p KNI Pilersuisoq A/S-illu suleqatigiinnissaat alloriarneruvoq pingaarutilik, taamaalillutami innuttaasut meeqqallu meeqqat pisinnaatitaaffii pillugit ilisimasaannik annertusaasinnaagatta", Meeqqat Illersuisuat Aaja Chemnitz Larsen oqarpoq.

MIO-p suliassaraa meeqqat pisinnaatitaaffiinik innuttaasunut tamanut ilisimatitsisuussalluni paasisititsisuussallunilu, tamannalu paasissutissiiviit assigiinngitsut aqqutigalugit ingerlanneqarpoq, soorlu nittartakkat, atuartitsinermi ilinniutit, pisinnaatitaaffiit pillugit plakatit il.il. Inuiaqatigiinni innuttat tamakkerlugit angussagutsigit paasissutissiivittut atorsinnaasagut tamarmik pingaaruteqarput. 

- Nuannaarutigeqaarput taamatut Meeqqat Illersuisuat MIO-lu isumaqatigiissuteqarfigigatsigit. Meeqqat pisinnaatitaaffii tamatta pingaartitaraagut, taamatulllu suleqatigiinnissarput ajunngitsuuvoq MIO-p sulineranik tapersersuisussaq.  Sineriammi pisiniarfippassuagut aqqutigalugit inuppassuit attavigisinnaavagut, tamannalu maanna MIO-p sulinermini iluaqutigisinnaalerpaa, taamatulllu amerlasuunut, ingammik meeqqanut inuusuttunullu  iluaqutaasussanngorluni, pisortaaneq Claus Jensen, KNI Pilersuisoq A/S-imit taama oqarpoq.