Meeqqat piniarsinnaallutillu aalisarsinnaanerat unioqqutitsinerua?

Inatsisartut ippassaq ataatsimiinneranni Inuit Ataqatigiinneersup, Ane Hansenip, apeqquteqaataanut ilaavoq, meeqqat aqqaneq marluinnarnik ukiullit piniarnermut allagartaq atorlugu aalisagartassinneqartarnerat. Taamaattoqarnera meeqqat pisinnaatitaaffiinik unioqqutitsinerusoq, Ane Hansen naliliivoq.

- Naalagaaffiit Peqatigiinni maleruaqqusaat malillugit, meeqqat aqqaneq marluinnarnik ukiullit suleqqusaanngillat, taamaammallu meeqqat nunatsinniittut, aqqaneq marluinnarnik ukiullit, piniarnermut aalisarnermullu allagartanik tunineqartarnerat aalisagartassinneqartarnerallu, meeqqat pisinnaatitaaffiinik unioqqutitsinertut nalilerpara, Inuit Ataqatigiinninngaanneersoq, Ane Hansen oqarpoq.

Inatsisartuni ataatsimiinnermi apeqquteqaatip oqallisigineqarnerani, Aalisarnermut Naalakkersuisoq, Finn Karlsen, oqarpoq, aalisarneq pillugu isumasiuisarnerni tamanna maluginiarneqarsimasoq, taamaammallu piniarnermut aalisarnermullu allagartartaarnissamut tunngatillugu inatsisinik allannguinissami, meeqqat pisassiissutinik tunineqarsinnaanerisa inatsisitigut allanngortinniarneqarnissaa aaqqinniarneqarumaartoq, Finn Karlsen neriorsuivoq.