Meeqqat pillugit sapaatit akunnerata naanerani ataatsimeersuartoqassaaq
Nunatsinni nunanilu allani immikkut ilisimasallit meeqqanik sullissineq pillugu ilisimasanik avitseqatigiinnissaq siunertaralugu Ilimmarfimmi sapaatit akunnerata naanerani katersuutissapput. Ataatsimeersuarnerup qulequtaraa ”Meeraaneq allanngoriartorfiusoq – meeqqap ilaqurariinni paaqqinnittarfinnilu inissisimanera.
Allattoq Peter Troelsen, Simon Uldum
maajip 08-at 2013 10:17
Ataatsimeersuarnermi peqataasut maajip qulinganit 12-ianut, ulluni pingasuni, sammisat oqimaatsut, soorlu meeqqat ataatsimoortarfii, meeraq kulturilu, suleqatigiit assigiinngitsut suleqatigiittarneri, meeraaneq ilaqutariinnerlu kiisalu politikkikkut unammilligassat.
Oqalugiartussat ilagaat meeqqat oqaaseqartartuat Aaja Chemnitz Larsen, Klaus Georg Hansen aamma Gitte Trondhein Ilisimatusarfimmeersut, Johannes Midskard Savalimmiuneersoq kiisalu danskit immikkut ilisimasallit Tina Basse Fisker aamma Peter Berliner Århus Universitetimi Danmarks Pædagogiske Universitetimeersut. Aammattaaq akisussaaffimmut tassunga naalakkersuisoq Martha Lund Olsen ataatsimeersuarnermik tallimanngorpat ullaap tungaani ammaassaaq.
