Meeqqat pillugit nalunaarusiaq aqagu saqqummissaaq
Nunatsinni meeqqat amerlanersaat pitsaasumik ingerlalluarlutillu peroriartorput. Kalaallit meerartaanik ukioqanngitsuniit 14-it ilanngullugit ukiullit ilaqutaasullu pillugit misissuinermi nutaami, Naalakkersuisut 2006-imili suliniutigisaanni, tamanna takuneqarsinnaavoq.
Allattoq Lotte Holm
februaarip 24-at 2009 08:26
Meeqqalli pingajorarterutaasa missaat angisuunik ajornartorsiuteqarput. Uumisaarneqartarput, ataatsimoortuni inuluugineqartarlutik, inuunertik nuannarinngilaat atuarfillu orniginartinnagu. Nukappiaqqat niviarsiaqqanit atukkamikkut ajornartorsiuteqarnerupput.
Nalunaarusiaq taaguutilik: ”Kalaallit Nunaanni Meeqqat” Ilaqutariinnermut Peqqissutsimullu Naalakkersuisoqarfiup aamma SFI-p, tassa Det Nationale Forskningscenter for Velfærd i Danmark-ip suleqatigiillutik suliaraat. Naalakkersuisut misissuinermik suliniuteqartuupput, tamannalu suliniutinut assigiinngitsunut, meeqqat inuusuttullu inuuniarnikkut atugaannik pitsanngorsaatissatut suliniutit 2006-imi aallartinneqartut ilagaat.
