Meeqqat peqqissunik nerisaqarnissaat angajoqqaat akisussaaffigaat

Misissuinerit kingulliit takutippaat nunaqarfinni meeqqat mamakujuttutorpallaartut sodavand-itorpallaartullu, meeqqallu pualasuut amerlavallaartut.

Angajoqqaat meeqqamik peqqissuunissaannut akissussaasuunerpaasut Nerisaqarnermut Siunnersuisoqatigiinni ilaasortaq Tine Pars oqarpoq.

-Isumaqarpunga angajoqqaat akisussaaffiijassanngikkigut. Uanga imatut isigivara peqqinnartunik qinigassaqartuaannarluta. Ullut tamaasa sodavand-itornissaq pisariaqanngilaq. Iluarnerpaassagaluarpoq meeqqat, kigutinut pualavallaannginnissarlu eqqarsaatigalugit sapaatip akunneranut ataasiarluni sukkulinnik tunisaraanni, Tine Pars oqarpoq.

Angajoqqaallu qinigassaqartuaannartut erseqqissarpaa oqarluni, imeq sukkulinninngaanniit peqqinnarnerusoq, naatitallu nunaqarfinni pissarsiariuminaattaraluarlutik qerisunik qillertuusaniittunillu peqartuaannartoq, kalaalimerngillu pissarsiarineqarsinnaajuaannarlutik. Meeqqallu mikineraniit peqqinnartunik nerisaqarnissaannik pisariaqarnerarlugu.

-Pisariaqarpoq inuiaqatigiinnut annerusumik paasissutissanik tunisisarnissarput, taamaammallu Nerisaqarnermut Siunnersuisoqatigiinnit meeqqanut sisamaniik qulinut ukiullinnut atuagaaqqamik saqqummersitsinikuuvugut, angajoqqaanut, meeqqerivinnilu sulisunut innersuussutaasinnaasumik. Aamma qanittumi pilersaarutigaarput siunnersuutit qulit pitsaasut TV-kkut saqqummiutissallutigit, Tine Pars oqarpoq. Tine Pars-ip ilanngullugu oqaatigaa piffissanngortoq najugaqarfitsinni iliuuseqarnissatsinnut, oqaluuserineqarnissaanullu takussutissaqareermat iliuuseqarnissatsinnut periarfissaqarluartugut. Iliuuseqanngikkuttamigooq suli ajornerusumut ingerlasaagut, maannakkullu iliuuseqarnissamut siunnersuuteqarnissamullu periarfissaalluartoq oqaatigalugu.