Meeqqat peqataatillugit pornolianut appakaanniartorpassuit
Meeqqat peqataatillugit pornolianut internetimi 30.000-t appakaateriaraluarsimasut, Atuagagdliutit ullumi saqqummersut allaaseraat.
Meeqqat peqataatillugit pornolianik isiginnaartoqarsinnaajunnaarlugu piiaammik Tele Greenland siorna ikkussisimavoq. Meeqqalli peqataatillugit pornolianut 30.000-t siorna 2006-imi internetikkut appakaateriaraluarsimasut kisitsisit maanna takutippaat.
John Siegstadip, Tele Greenlandimi tunisassiornermi pisortap, kaammattuutigaa, meeqqat peqataatillugit pornolianik isiginnaartoqartarneranik ilisimannittoqaruni, pasitsaassigaanniluunniit, taakku nalunaartaqqullugit.
- Meeqqat peqataatillugit pornoliat, taamaattoqarsimaneranilluunniit pasitsaassinerit, Red Barnet-imut nalunaarutigisaqqullugit atuisuvut kaammattorpavut. Nittartakkanik inerteqqutaasunik nalunaarsuinissaq pingaaruteqarpoq, tassami unioqqutitsisarnernik paasiniaanernut iluaqutaasinnaammat, John Siegstad AG-mut oqarpoq.
Meeqqat peqataatillugit pornoliat 9.000-t Red Barnetimut internetikkut siorna nalunaarutigineqarput. Taakkunannga qassit Kalaallit Nunaanneersuunersut kisinneqarsimanngillat. Red Barnetilli uppernarsarpaa saaffigineqartarsimallutik.
