Meeqqat paarinerlutat kommunit eqqumaffiginngilaat

februaarip 13-at 2006 16:57

Nunatsinni kommunit 18-usut akornanni kommunit pingajorarterutaat kisimik meeqqat paarinerlutat pillugit politikkikkut najoqqutassaqarput.

Ukiut sisamanngulersut matuma siornali kommunerpassuit tamatuminnga najoqqutassiorsimanngimmata Kanukoka-miit isumaginninnermilu taamanikkut naalakkersuisuusumiit qinnuigineqaraluarput meeqqat paarinerlutat pillugit politikkikkut najoqqutassioqqullugit, tamannali tamarmik maannamut malissimanngikkaat Kanukoka-p siulittaasuata oqaatigaa.

- Naatsorsuutigisimagaluarparput kommunit amerlanerusut meeqqanik inuusuttunullu politikkeqarnerminnik suliaminnik maanga anngussisimassasut. Maannakkumut illoqarfiit arfinillit taamaallaat Kanukoka-mut nalunaarsimapput meeqqanik inuusuttunullu politikkeqarnerminni nalunaaruteqarlutik. Tassalu Qasigiannguit, Ilulissat, Aasiaat, Nuuk, Nanortalik kiisalu kingulliulluni tutsiuppoq Qaanaaq, Lars Karl Jensen oqarpoq.

Lars Karl Jensen aperaarput kommunit tamarmik tamatuminnga iliuuseqaqqullugit noqqaassuteqartarsimanersut.

- Kommuninut kaammattuutigisarnikuuarput aallartitat ataatsimiinneranni allatigullu. Kingullermik uanga peqataaffigisanni kommunalbestyrelsemut qinikkat pikkorissartinneqarneranni Nuummi Ilulissanilu ingerlanneqartumi oqalugiaatinni aamma ilanngullugu taavara; kommunit kaammattoqqillugit kiisalu aamma Namminersornerullutik Oqartussat Naalakkersuisut Inatsisartullu aamma meeqqat inuusuttullu pillugit anguniagaqartumik suleriaaseqarnissaat politikkeqarnissaat aamma kommunininngaanniit ujartorneqartartoq, Lars Karl Jensen oqarpoq.

Kommunimmi piuaraluarlugit iliuuseqarumanngittuarsinnarpata, Kanukoka-miit pinngitsaalineqarsinnaanerpat?

- Kanukoka-p tungaaninngaanniit kommunit pinngitsaalisinnaanngilagut kisianni kajumissaarsinnaavagut taamatut politikkeqarnissartik anguniaqqullugu, sulinermi aammalu suleriaatsit ilusilersugaaneranni anguniakkanillu suliaqarnermi tamanna iluaqutaasussaammat, Lars Karl Jensen oqarpoq.

Inatsisartut ilaqutariinnermut ataatsimiititaliaani siulittaasup Agathe Fontainip Inatsisartut ukiuunerani ataatsimiilerpata kommunerpassuit meeqqanut paarinerlutanut politikkeqannginnerat pillugu oqaluuserisassanngortitsinialersaarpoq.