Meeqqat oqarasuaataat atorneqarluarpoq
Paarisap meeqqanut inuusuttunullu oqarasuaatikkut siunnersuisarfia 134 sapaatip apriilip 1-ani ukiunik sisamannguissaaq. 134-imullu ukiut sisamat ingerlaneranni saaffiginnittartut amerliartuinnarsimasut, Paarisami siunnersorti Anne Katrine Lefévre ilisimatitsivoq.
Siornaak 2003-imi 368-it siornalu 493-it 134-ip siunnersuisarfianut saaffiginnissimapput, saaffiginnittartunilu niviarsissat 14-it 16-illu akornanni ukiullit amerlanersaasimallutik.
Saaffiginnittartut ajornartorsiutiginerpaasarsimavaat kinguaassiuutitigut atornerlugaaneq, imigassamik atornerluineq angajaqqaanillu ajornartorsiuteqarneq.
Tamatumali saniatigut asasamik ajornartorsiuteqarnerit, angutaannaasarnermut imaluunniit arnaannaasarnermut tunngasut kiisalu qinngasaarneqartarneq aamma saaffiginnissutigineqartartut, Anne Katrine Lefévre oqarpoq.
Meeqqat inuusuttuaqqat angajoqqaallu 134-imut saaffiginnittarnerat akeqanngitsumik ingerlanneqarpoq.
134-ilu ullut tamaasa unnukkut arfineq marluk qulingiluallu akornanni ammasarpoq.
