Meeqqat oqaaseqartartuat: Meeqqat paasisarpagut
- Minnerpaamik nunatsinni meeqqat illersuisuat oqaaseqartartuallu kalaallisut qallunaatullu oqalussinnaasariaqaraluarpoq. Tamanut naligiimmik illersorsinnaasumillu sullississaguni, Inatsisartunut ilaasortaq ilaatigut oqarpoq.
Meeqqalli illersuisuata isornartorsiut paasiuminaatsippaa. Taassumalu MIO-mi tallimanik sulisoqarami, meeqqat kalaallisuinnaq oqaluttut tamarmik paasineqarnissaat qulareqqunngilaq.
- Isornartorsiut paasisinnaanngilara. Uanga allanik piginnaasaqarpunga aamma atorfinitsinneqarnikuuvunga piginnaasakka tunngavigalugit. Meeqqat Oqaaseqartartuatut inissisimavunga, kisianni aamma Meeqqat Siunnersuisooqatigeeqarput. Taakkullu meeqqat tusaaneqarnissaat sulissutigisarpaat meeqqallu namminneq oqaasii atorlugit oqaloqatigisarlugit, Aaja Chemnitz Larsen, pisortani ingerlatsinermik Ilisimatusarfimmi soraarummeersimasoq oqarpoq.
Inatsisartunulli ilaasortap Randi Brobergip isornartorsiunini tunngavissaqartippaa.
- Kalaallisuinnaq oqaasillit amerlanerpaartaat tassani sullinneqaramik, apeqquserparalu ilumut meeqqat pisinnaatitaaffiit meeqqanut kalaallisuinnaq oqaluttunut atuutsinneqarnersoq. Tassami illersuisuminnut oqaaseqartartuminnullu anngussissagunik soorunami ajornakusoortorujussuusooq meeqqat kalaallisuinnaq oqaaseqartuugunik, Randi Broberg oqarpoq.
Erseqqissaassutigalugulu kalaallit oqaasii Nunatsinni tunngaviusariaqartut.
- Kalaallisut oqalussinnaaneq piginnaasatut annerpaatut isiginiarneqartariaqarlerpoq massakkut, taannalu annertoorujussuarmik suli ajornartorsiutaasoq isiginngitsuusaaginnarsinnaanngilarput, Randi Broberg oqarpoq imalu itisiliilluni:
-Aporfinngortartut nunatsinni massakkut isiginngitsuusaarneqarput.Uffa pingaaruteqarluinnartuusoq sullinneqartoq kalaallisuinnaq oqaluppat aamma kalaallisut oqaluuneqartariaqartoq, tassa pisinnaatsitaaffiusariaqaraluarpoq taanna nunatsinni, Partiit Inuit sinnerlugit Inatsisartuni ilaasortaq oqarpoq.
Meeqqalli naammattumik illersorneqarsinnaasumillu tusaaneqartartut Meeqqanut illersuisoq isumaqarpoq. Aaja Chemnitz Larsenip erseqqissaassutigaa tallimanik sulisoqarami, taakkulu ilinniarsimasumik meeqqanut siunersortertaqartut, apersuinerni ikiuisartumik, aammalu isumaginninnermit siunersorteqarlutik, kiisalu pingasunik ilinniartunik ikiorteqarlutik. Taamaammat isornartorsiutit pissusissamisoortutut isigingilai.
- Kalaallisut paasilluarsinnaaqaanga. kalaallit oqaasiisa 80 procentii - 90 procentii paasisarpakka kalaallisullu oqalulaarsinnaallunga. Inersimasut meeqqallu kalaallisut oqaluttut apersornikuuakka. Paasisinnaavakka aamma paasisinnaavaanga. Taamaattumik isornartorsiut paasisinnaanngilara, Aaja Chemnitz Larsen oqarpoq.