Meeqqat Nunavummiut ikiorserniarneqalerput
Canadami nunap immikkoortortaata Quebecip ilaani Nunavimmi meeqqat inuusuttullu pillugit nalunaarusiaq, ukiut marluk matuma siornagut saqqummersinneqarpoq. Nalunaarusiaq nikallornartuuvoq, tassanimi oqaluttuarineqarput, meeqqat imernerup, nakuusernerup illoqarnikkullu atugarisani pitsaanngitsuni sumiginnagaallutik alliartortut. Nalunaarusiaq Quebecimi ministeriunermut Jean Charest-imut tunniunneqarpoq, taannalu qinnuigineqarluni nalunaarusiami innersuussutigineqartut piviusunngortinnissaannut akisussaassuussasoq, tamannalumi neriorsuutigaa.
Neriorsuutini taanna piviusunngortillugu iliuuseqarpoq, tassa sapaatip akunnerani kingullermi Quebecimi ministerit marluk meeqqanut akisussaaffeqartut Kuujjuarmut tikimmata, neriorsuutigalugillu millionit koruunit arlallit nalinginut pilersinneqassasut meeqqat ornittagassaat, aamma atuarfiit pitsaanerusut kiisalu tarnip pissusiinik ilisimasalinnik isumaginninnermilu siunnersortinik atorfinitsitsisoqassasoq. Millionit koruunit qasserpiaat aningaasaliissutigineqarsimanersut iluamik ilisimaneqanngilaq, taamaattorli ajornartorsiutit aaqqiivigineqarnissaannut naammattunik iliuuseqartoqassasoq neriorsuutigineqarpoq, taamaalilluni Nunavimmi meeqqat atugarisaat siunissaallu pitsaanerulerniassammata.
