Meeqqat Nunavimmiut sumiginnakkat ikiorserneqartariaqarput

Meeqqat sumiginnakkat, nunatsiniinnaanngitsoq, akitsinni Nunavimmi aamma sammineqarlualerput.

Aviisi Nunatsiaq News allappoq, nalunaarusiami aalajangersumik oqaatigineqartoq, meeqqat sumiginnakkat pisariaqartitamikkut ikiorneqanngitsut.

Nalunaarusiami, Ataatsimiititaliarsuarmit Quebec’s Youth Rights Commissionimit, suliarineqarsimasumi tikkuarneqarpoq, meeqqat sumiginnakkat ikiorserneqarnissaannut sorpassuarnik amigaateqartut. Suleqatigiilluannginnerit, misissuisannginnerit Nunavimmilu pissutsinik ilisimasakinnerit amigaatitut taakkartorneqarput.

Nalunaarusiami aamma allassimavoq, ikiuiniarneq iluamik siammarsimanngitsoq, aammalu ikiuiniarneq inuit taakku kulturiannut naleqqussagaanngitsoq.

Nunavimmi meeqqat sumiginnakkat atugaat nalunaarusiami sammineqarsimavoq. Ajornartorsiutit erseqqissarneqarsimasut tassaapput paarinerlugaanerit, tarnikkut napparsimaneq, kinguaassiutitigut atornerlunneqarsimanerit, ilaqutariinni peqqarniisaartarnerit, imigassamik aanngajaarniutinilluunniit atornerluinerit aamma imminortarnerit.

Ajornartorsiutit taama annertutigigaluartut, nalunaarusiortut qalleqqissaapput, ikiuiniarneq arriippallaartoq naammaqqajarnanilu.