Meeqqat nunaqarfinni najugaqartut peqqissusaat ajorneruvoq
Meeqqat Inuusuttullu Pillugit Ilisimasaqarfik, MIPI, Inuuneritta suleqatigalugu nalunaarusiamik saqqummiussivoq.
Meeqqat inuusuttullu pillugit nunaqarfinni iliuuseqartoqarnissaa MIPI-p ujartorpaa:
- Nunaqarfiit avinngarusimanerusullu tassaapput peqqinnissaqarfimmit angujuminnaannerpaat, meeqqat akornanni inooqatigiinnermi peqqissutsikkut assigiinngissutsit takutinneqartut annikillisinneqassappata, assigiinngitsorpassuartigut inuiaqatigiit tungaanniit ataqatigiissaakkamik suliniuteqarnissaq pisariaqarpoq, MIPI isumaqarpoq.
Meeqqat nunaqarfinni najugaqartut angerlarsimaffimmi nerisassanik amigaateqarneq, illoqarfimmiunit misiginerusaraat, nalunaarusiami ersersinneqarpoq.
Meeqqat nunaqarfinni illoqarfimmiunut naleqqiullutik akulikinnerusumik mamakujuttutortarput sodavanditortarlutillu, nunaqarfinnili meeqqat amerlanerujussuit sapaatip-akunneranut ataasiarlutik imaluunniit arlaleriarlutik puisip imaluunniit arferup neqaanik nerisarput.
15-inik ukiullit ullut tamaasa pujortartartut, illoqarfinnut naleqqiullugit nunaqarfinni amerlanerusut, nalunaarusiami aamma atuarneqarsinnaavoq, illoqarfinnili najugaqartut nunaqarfinni najuqartunut naleqqiullugit marloriarlutik arlaleriarlutilluunniit aalakoorsimasut amerlanerusut aamma nalunaarusiami erserpoq.
Innuttaasut peqqissusaannik immikkut ilisimasalik Birgit V. L. Niclasen nalunaarusiortuuvoq.