Siullunneq: Meeqqat nualluttut angerlarsimatissallugit pitsaaneruvoq

- Assigiinngissutaasoq tassaasorivarput Kalaallit Nunaanni meeqqat mikinerminni siullulersarnerat, tassalu suli ukioqaleratik, tassaappullu sivisuumik siulluuteqaleratarsinnaasut, Sjællands universitetshospitalimi professori, Preben Homøe, The Siutit Studyimut peqataasoq taama oqarpoq.

Ilisimatusaammi, siullerpaamik ingerlanneqartumi, sullulimmik kuuffissaliinikkut siulluttarneq pinaveersaartinneqarsinnaanersoq misissorneqarpoq.

- Sivisuumik siulluuteqalernissaq pinngitsoortinneqarsinnaanersoq misissorparput.

Preben Homøep nassuiaanera malillugu, siulluuteqalersarnermut meeraanermi siusissukkut anersaartuutitigut aseruuttoornerit nualluuteqarnermillu ajornartorsiutit pissutaasinnaapput.

Taamaammat angajoqqaat kajumissaarpai meerartik nuffasersimappat angerlarsimatiinnartassagaat, taamaaliornikkut meeraqatiminik tunillaannginniassammat. Aamma ulluni arlalinni napparsimasoornermik tamanna kinguneqassagaluarpalluunniit.

Meeqqalli mikisut sullulimmik kuuffissalernerinik misissuinerit pitsaaqutissanik maannamut takussutissaqarsimanngillat.

- Nunarsuaq tamakkerlugu paasisat naapertorlugit, sullulimmik kuuffissaliinerup sunniutai neriuutigineqartumit annikinnerupput.

Ilisimatusaammik The Siutit Studyimik ingerlatsisut neriuutigaat siulluttarnerup pinaveersaatinnissaanut iluaqutissamik nassaartuusinnaassallutik.

The Siutit Studyip 2020-imi naammassineqarnissaa naatsorsuutigineqarpoq, meeqqalli suliniummut peqataasussat naammattut pissarsiarinissaat ajornartorsiutigineqarpoq.