Meeqqat nersornaatisipput
Nuummi Kangillinnguit Atuarfianni atuartut minnerit ilaat, tassa 3. klassimeersut tupinnanngitsumik ippassaq tulluusimaaqaat, tassa ”Atuarfitsialak” atuutilermalli ingerlalluarsimasutut atuartut nukarlersaattut allagartanik nersornaatinik agguarneqaramik.
Atuarfitsialak ukiut qulit matuma siorna atuutilermalli, atuartut klassit siullianniit klassit pingajuat ilanngullugu immikkoortukkaanik katitigaapput, tassa modulinik pingasunik siullernik taaneqarsinnaasunik, allagartanik nersornaatisianik - diplominik - ippassaq agguaaneq atuartunut qiimmassaatitut taaneqarsinnaavoq.
Meeqqat atuarfianni atuarneq, atualeqqaarnermiit klassit aqqarngat tikillugu ingerlaannavittussatut siornatigut isigineqartaraluarpoq – Atuarfitsialalli atuutilermat modulinut pingasunut agguataarneqarpoq, atuartullu taamaalillutik atuarnermik ingerlanerat siusinaarlutik nalilersorsinnaalissavaat.
Inerisaavimmi immikkoortortami pisortaq, Kaali Olsen oqarpoq, atuartut allagartanik nersornaatinik qanoq akulikitsigisumik agguarneqartarnissaat atuarfiit tamarmik immikkut namminneq aalajangertassagaat.
Kangillinnguit Atuarfianni atuartut, angajoqqaat ilinniartitsisullu ippassaq unnukkut katerisimaarput, meeqqat erinarsorput nersornaatisiassaminnillu agguarneqarlutik.
