Meeqqat naamaarniartartut amerliartoqqilersut

Nuummi meeqqat inuusuttuaqqallu ikiaroorniutiugalugu naamaarniartartut piffissami kingullermi amerliartulersimapput. Tamanna pillugu Nuummi angajoqqaat, niuertarfiutillit kiisalu sanaartorfimmiut eqqumaqquneqarlutillu mianersoqquneqarput. Meeqqat inuusuttuaqqallu naamaarniartartut ukiut tamaasa ikilisarlutillu amerliartulersartut, Line Dalentoft, Nuup kommuneani pinaveersaartitsinermut siunersorti oqarpoq:

- Naamaartarneq ukiut tamaasa takkuttarlunilu peeruttarpoq, maannakkulluaasiit ukiariarmat takkuteqqissimavoq.

Naamaartarneq ulorianartorujussuummat Nuup kommunea angajoqqaanut niuertarfiutilinnut sanaartorfimmiunullu ilisimatitsivoq mianersoqqullugit.

- Kingunipiloqartarnera sakkortunerusarmat siullermik angajoqqaat, taava pisiniarfeqarfiit sanasullu tamarmik allakkanik nassinneqarput, angajoqaanut pingaartillugu naamaarnerup ulorianassusia meeqqaminut oqaloqatigiissutigeqqullugu.

- Sanaartorfinni soorlu gassinik saqqumitsitsisarnermut atatillugu soorlu kajumissaarutigaarput soraarnermi gassit parnaaqqasumut mattuttaqqullugit, pisiniarfiillu naamaarutaasinnaasunik meeqqanut tuniseqqusaannginnerat aamma erseqqissaatigalugu.

Eqqaasitsisoqarnerit tamaasa malunnartarpoq suliffeqarfiit pineqartut eqqumanerulersartut piffissalli ingerlanerani tamanna aamma puigotuusineqartartoq Line Dalentoft oqarpoq.

- Oqariartuut una assut apuukkusuppara, tassa angajoqqaat qitornartik soorunami tatigalugu aneerusukkaangat aneertittarpaat, kisiannili aamma eqqarsaatigeqqunarpoq; qitornarput aneeraangami sumiittarpa? Kikkut ilagisarpai? Aamma qitornarput ikinngutimini tukkuniaraangami ilumut tassani tukkusarpa? Tamaattumik tukkuffigiumasaasa angajoqqaavilu ilisimatitseqatigiittarnissaq assut kaammattuutigaarput.

Angajoqqaajullunimi atuartuuteqarluni pasitsaassaqarsimagaannilu suut maluginiagassaallutillu eqqumaffigisassaappat? Line Dalentoft akivoq:

- Ilisarnaatit maluginiagassat ukuusarput qitornaasoq pissuserisartakkaminit allaanerusumik pissusilersortalersimappat tamanna apeqquasertariaqarpoq. Aamma meeqqap qasoqqanera eqiasulernera aammalu peqqippasigunnaarnera tamakkuusinnaapput ersiutaasut siulliit.

Meeqqanik naamaartunik naammattuuisut ingerlaannartumik oqaatiginnittarnissaat assut pingaaruteqarnerarpaa. Meeqqat naamaarniartartut qanoq amerleriarsimatiginerat erseqqivissumik kisitsisaatigineqanngilaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat