Meeqqat naaggaarsinnaanissaminnut periarfissaqalerput
Tamatumani meeqqat angajoqqaaminnut annertuumik imigassamik atornerluisuusunut taakkunanngaluunniit kinguaassiuutimikkut atornerlunneqarsimasut, pinngitsaaliissummik angerlartinneqartarnerat pinaveersaarneqarpoq.
- Ima pisoqarsimappat meeraq kinguaassiuutimigut atornerlunneqarfigisaminut angerlartinneqarluni, taamalu atornerluinerup ingerlateqqinneqarnissaa qularnaateqarani, taava isumaqarpunga meeraq naaggaarsinnaasariaqartoq, taama oqarpoq SF-imi inunnik isumaginninnermut tunngasut pillugit oqaaseqartartoq Özlem Sackiz.
Meerarli pillugu iluarsartuusseqqinnissamik isumaqatigiissummi Enhedslisten eqqaassanngikkaanni partiinit tamarmiusunit isumaqatigiissutigineqartumi, angajoqqaat meeqqaminnik najuinissaminni imaaliallaannaq pisussatut pisinnaatitaaffiat peerneqassaaq. Isumaginninnermi siunnersortit, perorsaasut ilinniartitsisullu meeqqanik isumakuluuteqartut, angajoqqaat isumaqataallutik akuersiteqqaarnagit meeqqamut tunngasunik misissuinissaminnut periarfissaqalissapput. Tamanna Venstret inunnik isumaginninnermut tunngasut pillugit oqaaseqartartuata Ellen Thrane Nørbyp, qilanaaraa.
Tamanna isumaginninnermi siunnersortit, meeqqerivinni perorsaasut klubbini sulisut allallu meeqqamut qanimut attuumassuteqartut akornanni annertunerusumik suleqatigiinnermik kinguneqassaaq, ajornartorsiutillu annertusivallaannginnerini paasineqartarnerat annertunerujussuanngussalluni, meeqqat inuunermik sinnerani ajoquserneqariartinnagit.
Inatsimmik allanngortitsinissaq meeraq pillugu iluarsaaqqinnermik taaneqartartup ilagaa.
Maani Kalaallit Nunaanni isumaginninnermut naalakkersuisoq Maliina Abelsen isumaqarpoq danskit suliniutaat soqutiginaateqartoq. Maannalu taassuma suliassaq Naalakkersuisunut saqqummiutilersaarpaa, inatsisip Kalaallit Nunaannut imaaliallaannaq nuunneqarsinnaanera oqallisigitinniarlugu.
