Meeqqat misileraatigineqartut utoqqatserfigineqarnissartik utaqqeqqaartariaqassavaat

Danmarkimi innuttaasut ilaat meeraanerminni meeqqat angerlarsimaffiinut 1940-kkunnit ukiunilu qulikkaani tulliuttuni inissinneqartarnerminni kinguaassiutitigut atornerlunneqartarsimanertik, allatigulluunniit sumiginnarneqarsimanertik pillugu Danmarkip statsministerianit Mette Frederiksenimit ukioq manna aggustip ulluisa 13-ianni utoqqatserfigineqassapput, kalaallilli meeqqat 22-t misileraatigineqartut utoqqatserfigineqassanngikkallarput.

Kristine Heinesenip utoqqatserfigineqarnissani ukiuni 68-ini utaqqisimavaa, sulili utaqqimaaqqaalaartariaqassaaq:
- Tamanna nuannarivallaanngilara, Kristine Heinesen oqarpoq.
 
Kalaallit meeqqat 22-t, Kristine Heinesen taakkununnga ilaalluni, Danmarkimi oqartussanit, Dansk Røde Korsimiillu, 1951-imi Danmarkiliartinneqarnerisa utoqqatsissutigineqarnissaa pilersaarutaagaluartoq, maanna kinguartinneqarallarpoq.
 
Meeqqat 22-t Danmarkimut 1951-imi aallartitaapput danskillu atuarfiini oqaatsinik kulturiannillu ilinniartinneqarlutik. Nunatsinnut uterunik inuiaqatigiinni danskisut inuunermut maligassiuisuunissaat taamani neriuutigineqarpoq.

AAMMA ATUARUK Ukiuni 68-ini utaqqereerlutik ukiumi ataatsimi utaqqeqqissasut

Meeqqat amerlanerit ilaquttaminnut uteqqinngillat. Danmarkimeereerlutik uteramik ilitsoqqussaralugu oqaatsitik annaasimavaat meeqqallu angerlarsimaffiannut Nuummiittumut inissinneqarlutik.

'Takussutissanik ulikkaarpoq'

Meeqqat meeraanerminni assigiinngitsutigut atornerlugaasimasut, paarinerlunneqarsimasut persuttarneqartarsimasullu, statsministerip pisortatigoortumik najugaqarfigisaani Marienborgimi aggustip ulluisa 13-ianni utoqqatserfigineqassapput, kalaallilli misileraatigineqarsimasut qaaqqusanut ilaanngillat.

Statsministereqarfik KNR-imut taama ilisimatitsivoq.

AAMMA ATUARUK Mette Frederiksen meeqqat misileraatigineqartut utoqqatserfiginiarlugit neriorsuisoq

 

Misileraanermi suliaq pillugu qulaajaasoqarnissaa, Naalakkersuisut, statsministeriusimasullu Lars Løkke Rasmussenip ukioq manna marsimi isumaqatigiissutaata inernera, statsministerip Mette Frederiksenip utaqqeqqaarniarpaa.

Kalaallit Nunaanni Danmarkimilu oqartussat suliamut atatillugu akisussaaffii ilaatigut paasiniarneqassapput.

AAMMA ATUARUK Meeqqat misileraatigineqartut partiit isumaqatigiinngissutigigaat

Utoqqatsertoqartussaanngikkallarnera, Kristine Heinesenip paasiuminaatsippaa, utoqqatsertoqartariaqarneranummi takussutissat naammareersut, taanna oqarpoq:

- Sunaana misissorniaraat? Uagut meeraanitsinni qanoq pineqarsimanerput oqaluttuarereerparput, taamaammat utoqqatsertoqarnissaanut neriorsuutertik piviusunngortittariaqarpaat, Kristine Heinesen oqarpoq.

Taassuma tusagassiortup atuakkiortullu Tine Bryldip atuakkiaa "I den bedste mening" pingaarnertut innersuussutigaa. Taanna kalaallit meeqqat 22-t pinngitsaalisaassummik 1951-imi nuutsinneqarnerat, meeqqallu angerlarsimaffiannut inissinneqarnerannut tunngavoq.

AAMMA ATUARUK Både Danmark og Grønland har ansvaret for eksperimentbørnene

Ilisimatuutut allaatigisat, inunnik apersuinerit, Tine Bryldillu atuakkiaa aallaavigalugu 2010-mi filmiliaq "Eksperimentet" taassuma saniatigut aamma innersuussutigineqarput.

Kielsen: Qulaajaasoqarnera utaqqineqarpoq

Danmarkip naalakkersuisuisa utoqqatsernissaq siunniukkaluaraat, suliap qulaajarneqarnissaa utaqqeqqaarlugu utoqqatserniartut, Naalakkersuisut siulittaasuata Kim Kielsenip juunimi ima oqaaseqarfigaa:

- Kisianni qallunaat massakkut naalakkersuisortaavata erseqqissumik oqariartuutigereernikuuaa utoqqatserniarluni. Taanna qujarunnarpoq taamaattorli kissaatiginassaaq aamma qulaajagassartaa qanoq imaqarnersoq paasissallugu, Kim Kielsen oqarpoq.

Inatsisartulli Ilaqutariinnermut Peqqissutsimullu ataatsimiititaliaata siulittaasuata Laura Táunâjiip tamanna akerlilerpaa:

- Qulaajagassat qangali qulaajarneqarsimasussaagaluarput. Suliap kinguartinneqarnissaanut pissutissaqanngilaq, Laura Táunâjik, Siumumeersoq, oqarpoq.

Laura Táunâjik Partii Naleqqamit tapersersorneqarpoq, Inuit Ataqatigiillu Folketingimi ilaasortaatitaannit aamma tapersersorneqarluni.

AAMMA ATUARUK Utoqqatsertoqassagaluarpalluunniit misissuisoqarnissaa suli pingaaruteqarpoq

Misileraanermi suliaq pillugu qulaajaasoqareernerata kingorna Mette Frederiksenip utoqqatsertoqarnissaanit tunuartilinnginnissaa, Kristine Heinesenip neriuutigaa:

- Neriuppunga taamaaliussanngitsoq. Neriuutigilluinnarpara. Isumaqarpunga utoqqatsertariaqartut. Uannut tamanna isumaqartupilussuuvoq, ilaqutaasunullu aamma. Taava eqqissiallattoqarsinnaassaaq, Kristine Heinesen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat