Meeqat 1951-imi Danmarkiliartinneqartut ilaat taamani dronningiusup Ingridiup ilassigai assimi takuneqarsinnaapput.

Isumatsialak kinguartiteriniarnerluunniit? Meeqqat misileraatigineqartut partiit isumaqatigiinngissutigigaat

Meeqqat 22-t Danmarkimut 1951-imi aallartinneqartut pillugit suliaq qulaajarneqassasoq, Naalakkersuisut siulittaasuata ministeriunerullu qanittukkut isumaqatigiissutigaat.

Tamannali kinguarsaataannaassasoq, partiit arlallit isumaqarput, partii Naalakkersuisuni siuttuusoq Siumut taakkununnga ilaalluni.

Suliaq qulaajagassanngortillugu danskit meeqqanut isumaginninnermullu ministeriata, Mai Mercadop (K) aamma peqqinnissamut, isumaginninnermut inatsiseqarnermullu naalakkersuisup, Martha Abelsenip (S) suleqatigiissutigissagaat aalajangerneqarpoq.

Tamannalu kinguarsaataannaasoq partiit pingasut isummersorput.

- Qulaajaanerit assigiinngitsorpassuit ingerlanneqareernikuugaluarput, taamaammat taamatut soorlulusooq sivitsorsaqqillugu aaqqinneqaannarnera uggornarpoq, Jens Napaattooq Partii Naleraq sinnerlugu taama oqarpoq.

- Tassunga killinnermi aamma oqariartuuteqartoqarnermi utoqqatsertoqannginnissaannik immaqa saammarsaataasinnaavoq, Stine Egede Inuit Ataqatigiit sinnerlugit taama oqaaseqarpoq.

Utaqqikatannerlu immaqa tupaallannartumik naalakkersuisuutitaqartuni allanit tusarsaavoq.

- Ukiorpassuit matuma siornatigut tamakku qulaarlugit naammassineqareertussaagaluartutut isigisakka isumaqarpunga kinguarsarneqaqqittariaqanngittut, Laura Taunajik Siumumit taama oqaaseqarpoq.

Partiilli taassuma Naalakkersuisoqatigiinni suleqataata, Atassutip, naalakkersuisut siulittaasuata ministeriunerullu isumaqatigiissutigisaat iluarisimaarpaa.

- Isumaqarpunga qulaajaasoqartariaqartoq, taavalu paasissutissat ersarinnerusumik tunniunneqarsinnaasariaqartut, Aqqaluk Heilmann Atassut sinnerlugu taama oqaaseqarpoq.

Meeqqat 22-nit 1951-imi Danmarkimut aallartinneqarsimasunit ullumikkut arfinillit suli peqqipput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat