Ilisimatooq: Meeqqat misigittarnerusariaqarput

Issittumi inuusuttut akornanni kiserliortarneq akiorniassagaanni tamakku sammineqartariaqarput, finlandimiu ph.d-nngorniaq taama inerniliivoq. Nittartagaq Arctic Deeply taama allaaserisaqarpoq.

Anna Reetta Rönkäp Finlandip avannaani kiserliortarneq ilisimatusaatigaa. Taanna oqaluttuarpoq issittormiut kiserliornermik inooqatigiinnikkullu ajornartorsiutinik allanik, soorlu nakuusernermik, imigassamik ikiaroornartumillu atornerluinermik kiisalu imminut toquttarnermik ajornartorsiuteqarnerusartut.

Rönkäp Finlandimi ilisimatusarfimmi University of Oulumi ph.d-nngorniutini maanna inaarsaleruttorpaa, ilisimatusarninilu tunngavigalugu inerniliivoq meeqqat inuusuttullu kiserliortarnerat pimmatiginnittarnermut attuumassuteqartupilussuusoq.

Pimmatiginninneq issittumi inoqarfeeqqani avinngarusimasuni ajornartorsiutaasipilussuuvoq. Inuusuttullu ilaquttatik qimallugit illoqarfinnut anginerusunut nuukkaangamik nutaanik ikinngutitaartornissartik ilisarisimasaqalernissartillu aamma ajornartorsiutigilersarpaat.

Pimmatiginnittarnerlu akiorniassagaanni atuarfinni tamani avatangiisit toqqissisimanartuunissaat qulakkeerneqartariaqarpoq, Anna Reetta Rönka ilisimatusaatigisani tunngavigalugu taama inerniliivoq:

- Meeqqat misigittarnissartik siusissukkut ilikkartariaqarpaat, ataqqinnittariaqarput inooqatigiinnikkullu pissuserisassanik tunngaviusunik allanik ilinniartariaqarlutik. Kikkulluunniit pimmatigineqaratik inuusinnaasariaqarput - kiserliortarnerup akiorniarneqarnerani tamanna qitiulluinnarpoq, Anna Reetta Rönkä taama oqarpoq.