Meeqqat mikisut Israelimit anisinneqalerput

Taamatut aalajangiinerat akerlerineqaqaaq, tassami sorsunnersuarmi kingullermi nazistit anisitsisarneri, aammattaaq meeqqanik mikisunik, Israelip eqqaamasaasa annernarnerpaat ilagimmatigik.

Camille tallimanik qaammatinillu pingasunik ukioqarpoq, børnehaveklassemiittullu allat ilagalugit Israelimiut ilisimanngisaannik inunngorsimalluni peroriartorsimallunilu, kisiannili arfinillit inorlugit ukioqarami feeriareernerup kingornagut 1. klassemi atualersussaanngilaq. Camillep arnaata Israelimiut taakkua namminneq angerlarsimaffiini ukiuni aqqanilinni isumagalugillu paaqqutarisarsimagaluarpai, ukiunili kingullerni sulinissamut akuersissuteqarfigineqarsimanani, taamaattumillu Camille maanna anisinneqartussanngorluni.

Nunami namminermi pissutsinut ministeri Eli Yishai inatsisartut oqaluttarfianni issaq oqarpoq, angajoqqaat meeqqatik oqaluttuuttariaqaraat, arraa taamaaliorneq unitsinniarsiuk, ukiut tallimat maaneereerpugut.

Ministerip taassuma nunani allamiut sulinissaminnut akuersissuteqanngitsut, meeqqatik utoqqatsissutiliullugit Israelimiinnerarlugit unnerluutigai.

Kikkulli tamarmik tamanna isumaqatiginngilaat, akerliuniartunullu amerlaqisunut aammattaaq uppernanngivissutut ilaalluni Israelimi Holocaustimi annattuusimasut peqatigiiffiannut siulittaasoq, uppernanngivissutut, tassa pissutigalugu taakkua politikkimut akuliunneq ajuvikkaluarmata.

Holocoaustimi annattuusimasut siulittaasuata Noach Flugip, nazistit juutit meerartaaannik anisitseralernerat nammineq eqqaamavaa. Taassuma kammalaataasalu ministeriuneq Netanyahu aalajangiinerminik allanngortitseqqullugu qinnuigaat, maannamulli suli iluatsinngitsumik.

Anisitserarnerit pilersaarut malillugu sapaatit akunneri marluk sinnilaarlugit qaangiuppata - septembarip arfineq-pingajuanni - pissapput.