Meeqqat kaattut iliuuseqarfigineqarlik misissuisitsinerit pinnagit
Meeqqat kaattut qanoq iliuuseqarfiginiassagaanni, atuarfinni nereqatigiissitsisarneq piaartumik qanoq iliuuserineqarsinnaasutut taasariaqarpoq. Taamatullu aaqqissuussinissaq sapernarsinnaanngilaq, Line Frederiksen oqarpoq. Nangillunilu oqarluni Nunatsinni politikerit akisussaasut tamakkununnga atatillugu paamaarpallaartut. Atuarfinni nereqatigiissitsisarnerup saniatigut aningaasaliissutigineqartut qanoq atorluarneruneqarsinnaanerat siunertaralugu, ataqatigiissaakkanik suliniuteqartoqartariaqarpoq, aamma Ineqarnermut, Ilinniartitaanermut, Inunnik isumagininnermut Peqqinnissamullu naalakkersuisoqarfiit akornanni ataqatigiissaarluakkamik suliniuteqartariaqarput. Inuit ulluinnarni ajornartorsiutinik tamakkunannga malugisaqarlutillu isigisaqartartut isumalioqatigiiffissaannik pilersitsisoqartariaqarpoq, aningaasaliissutaasut sukkut iluaqutigineqarsinnaanersut tamakkua nalunnginnerummassuk. Suliniutinik ingerlanneqartunik pissutsillu qanoq ingerlanerannik nalileeqqittarnerit Nunatsinni atugaanngippallaaqaat. Nalileeqqikulanerusuugaanni suliniutit iluatsitsiffiusutut nalilerneqartut katersorlugit nuna tamakkerlugu aallartisarneqarsinnaasassagaluarput. UNICEF-ip Nunatsini pissutsinik isornartorsiuinera meeqqat kaattut eqqumaffigineqarnerulernerannik kinguneqarmat peqatigiiffitsinni qujagigaluarlutigu, aappaatigut avataaniit iluamik eqqarssaateqarlutik qanoq iliuuserineqarsinnaasunik oqalullutik akuleruteqattaarnerat pinngitsooqqunaraluarpoq, ajornartorsiutimmi taamaattut Kalaallit Nunatsini inuiaqatigiit iluanni angajoqqaat peqatigalugit aaqqiiffiginiarneqarluarsinnaanerummata, Line Frederiksen oqarpoq. Soorunami meeqqat nerisassaqartinnissaat angajoqqaat akisussaaffigaat, atuartulli 17 procentiisa perlilerlutik innartarnerat atuariartortarnerallu angajoqqaat akisussaassuseqanngitsumik pissusilersornerinnaanik pissuteqanngilaq. Angajoqqaaqarpoq suliffeqaraluarlutik ineqarnermut meeqqerivinnullu akiligassat aamma isumagisariaqartarpaat, aningaasarsiaalli ima ikitsigisarlutik allaat meeqqatik ullut tamaasa naammattumik nerisassaqartissinnaasarnagit iluamillu atisassaqartissinnaasarnagit. Taamaammat oqartariaqarpugut tunngaviusumik inuiaqatigiit ingerlanneqarnerat equngassuteqarpoq, Line Frederiksen oqarpoq.
