Meeqqat kaattarneri pillugit angajoqqaat ilaat nassuerput
Ilulissani silagissoq seqinnarilluni innutaasut naalakkersuinermillu suliaqartut 60-it tikillugit amerlassuseqartut ippassaq innutaasunut ataatsimiititsinermi ataatsimeeqataapput. Bendt Kristiansen Qaasuitsup kommuneani isumaginninnermut ataatsimiititaliami siulittaasuusoq oqarpoq, innutaasut ataatsimiitinneqarnerat uummaarissumik ingerlanneqartoq.
Ajornartorsiutip qaangerneqarnissaanut siunnersuutinik saqqummiussipput aammalu ilaqarput meeqqat kaattarnerisa pissutigisaannut nassueruteqartunik. Aningaasat pissarititaasut naammanngikkaangata nerissasat salliutillugit pisiarinissaat ajornakusoortartoq ataatsimiinnermi peqataasut ilaat oqarpoq.
Ilaqutariinnut pikkorissartitsisarnissaq siunnersuutigineqarpoq ilaqutariit aningaasatigut pissakinnerusut qanoq iliorlutik pilersaarusiorsinnaanerat aningaasallu atugassat atorneqarnissaannut pilersaarusiorlutik pikkorissartinneqarnissaat siunertaralugu.
Ilaqutariit ataatsimiinnermi peqataasut imigassamik ikiaroornartumillu atornerluisuullutik nassuerput tamannalu meeqqat nerisaqarniarnerannut sunniuttarlutik. Tupaallaatigineqarpoq ilaqutariit meerallit aningaasatigut isertitakinnerusut aningaasatigut missingersuusiullaqqinnerummata nerisassallu pisiarinissaannut pingaarnersiusarmata, ilaqutariinnut aningaasatigut isertitaqarnerusunut sanilliullutik. Meeqqat kaattut pillugit oqartarnerup nalilersorneqarnissaa pisariaqartinneqarpoq, erseqqissumik paasineqassammat meeqqat kaattut pillugit oqartoqaraangat sunarpiaq pineqarnersoq nassuiarneqarsinnaaniassammat.
