Meeqqat juullisiortissavaat
Danmarkimi Kalaallit Nunaannilu ilaqutariit aningaasassaaleqisut allatullu atugarliortut Bikubenip aningaasaateqarfianit juulleriartornerani ukiumoortumik tunineqartarput, aningaasallu agguaattakkatik maanna amerlisimavaat.
- Aningaasat Nunatsinni illoqarfinni nunaqarfinnilu aqqanilinni juullimut aaqqissuussinernut atugassanngorlugit agguaatissavavut, Krissie Winberg peqatigiiffimmeersoq oqarpoq.
Nanubørn ukiut pingajussaa juulleriartornerani taama aaqqissuussivoq, iluarineqartaqaarlu.
Nuummi katersortarfik meeqqanut ulluni pingasuni aaqqissuussinernut atorneqassaaq, tassa decembarip ulluisa 23-anni, 24-anni 25-annilu. Iffiortoqarlunilu, mamartunik nerisassiortoqarlunilu titartakkanik filmertoqassaaq, Nanubørnillu juullip inuata aggernissaa allaat aamma iluatsissimavaa.
Nanubørnikkut suleqataat, soorlu nunatsinni peqqissaasut miljøarbejderillu, Nanortalimmi, Narsami, Qaqortumi, Tasiilami, Illoqqortoormiuni Qaanaamilu, Qaanaallu nunaqarfiini Savissivimmi, Siorapalummi Qeqertanilu, meeqqanut juullimut aamma aaqqissuussissapput.
Taamatut aaqqissuussisarneq nuannarineqaqisoq illoqarfinni nunaqarfinnilu allani ukiuni aggersuni atorneqartalissasoq peqatigiiffiup neriuutigigaa, Krissie Winberg oqarpoq.
