Meeqqat Juulliat aallarteqqinneqarpoq

Juullimi neriulluarnissaq, nuannannissaq, orpiliaqarnissaq tunissutissallu ilaasa misiginngitsoortarpaat. Ilaqutariippassuit kissaatigisamisut juulliornissartik akissaqartinneq-ajorpaat. Taakkuli maanna ikiorserniarneqalerput. Allan Iversenip Christina Mølholmillu Meeqqat Juulliata aallarteqqinnissaa sulissutigaat, inuiaqatigiinnilu kajuminneq annertooq misigimavaat.

-Ilaqutariit meerartallit peqataasarsimasut oqariartuuteqarfigerusuppagut. Atugarliortupilussuupput, taakkununngami juullisiutinik nerisaqarnissaq, orpiliaqarnissaq minnerunngitsumillu tunissutissaqarnissaq nalinginnaasuunngilaq, Allan Iversen oqaluttuarpoq.

Suliniuteqartut marluusut Nunafondenip periaaserisartagaanik ingerlatitseqqinnissaminnut akuerineqarsimapput, taamaammat katersortarfimmi Nuummi Meeqqat Juulliannut peqataasartunut juulli aamma ukiormanna taamaassaaq.

-Tallimanngormat ataatsimiippugut sapaatip akunneratalu naanerani tunissutissanut, orpilissamut katersortarfiullu attartornissaanut aningaasanik pissarsisimalluta. Nerisassanut imeruersaatissanullu aningaasaliisussanik amigaateqarpugut, ullulli ingerlanerani tamatuma akissutissarsiffiginissaa ilungersorluta sulissutigaarput, Christina Mølholm nassuiaavoq.

Nerisassanut imeruersaatinullu aningaasaleerusuttut Allan Iversen attaveqarfigisinnaavaat uunga aliv@peqqik.gl.