Meeqqat isummersorfianneersut: Meeqqat pisinnaatitaaffii kikkulluunniit ilisimasariaqarpaat

Meeqqat isummersortarfianneersut, Nivi Rosing Minik Olesenilu, Unicefip Københavnimi ataatsimeersuartitsinerani peqataasut taama kaammattuuteqarput.

Meeqqat pisinnaatitaaffii nunani tamalaani atuuttut taasinnaasatit qassiuppat?

Nunatsinnilu qanoq naapertorneqartiginersut ilisimaviuk?

Nalorniguit taava kommunit meeqqanut isummersorfigititaata, NAKUUSA-p, Unicefillu anngussivigerusutaasa ilagaatsit.

Naalagaaffiit Peqatigiit Meeqqat pillugit isumaqatigiissutaat

Naalagaaffiit Peqatigiit meeqqat pillugit isumaqatigiissutaat - meeqqat inuusuttuaqqallu 18-it inorlugit ukiullit pisinnaatitaaffii pillugit 54-inik immikkoortulik - 1989-imi akuerineqarpoq.

Meeqqat pillugit isumaqatigiissummi ilaatigut ima allassimasoqarpoq:

- Inersimasut iliuserisaat meeqqanut sapinngisamik iluaqutaassappput (immikkoortoq 3) 

- Akeqanngitsumik atuartuusinnaatitaaneq (immikkoortoq 28)

- Sunngiffeqarsinnaatitaaneq pinnguarnissamullu piffissaqartitaaneq (immikkoortoq 31)

- Kinguaassiutitigut atornerlunneqarnermut illersorneqarsinnaatitaaneq (immikkoortoq 34)

- Meeqqat sumiginnarneqarsimasut, atornerlunneqarsimasut naalliutsitaasimasullu naalagaaffimmit ikiorneqassapput (immikkoortoq 39)

Paasissutissanik pissarsiffik: Naalagaaffiit Peqatigiit meeqqat pillugit isumaqatigiissutaat

NAKUUSA Unicefilu Naalagaaffiit Peqatigiit meeqqat pillugit isumaqatigiissutaat - ukiut 30-t matuma siorna tassa 1989-imi atuutilersoq - tunngavigalugu meeqqat pisinnaatitaaffeqarnissaat qulakkeertarpaat.

Meeqqat nunatsinneersut, Savalimmiuneersut, Ålandimeersut nunallu avannarlerneersut - aalajangersakkamik - nunani tamalaani naalakkersuisut meeqqat pisinnaatitaaffiisa ilisimaneqarnerulernissaannik sulissuteqarnerannut tunngaviusussamik - akuerseqataajartorlutik Naalagaaffiit Peqatigiit Københavnimi allaffeqarfianni ulluni makkunani ataatsimeeqataaleruttorput.

Nivi: Meeqqat kannguttaatsuliorfigitinnermut illersorneqartariaqarput

Meeqqammi pisinnaatitaaffii ilisimasaqarfigineqarpallaanngitsut, 16-inik ukiulik Nivi Rosing Nuummeersoq isumaqarpoq.

Nivi Rosing Kommuneqarfik Sermersuup meeqqanut isummersorfigititaani ilaasortaavoq, aamma meeqqat inuusuttuaqqallu nunatsinniit ataatsimeersuarnermi peqataasut arfiniliusut ilagaat.

- Meeqqat pisinnaatitaaffii meeqqanit tamanit inersimasunillumi ilisimaneqartariaqarput. Isumaqarpugummi pisinnaatitaaffitsinnik ilisimanninneq naapertuinerlu toqqissisimatitsinerpaasartut ilagigaat, Nivi Rosing oqarpoq.

Meeqqat pisinnaatitaaffii Meeqqanut Isummersorfianiilereerami aatsaat ilisimalerpai. Taamanili Naalagaaffiit Peqatigiit meeqqat pillugit isumaqatigiissutaanni immikkoortut katillugit 56-iusut inunnut allanut ilitsersuutigisarpai, oqallisigisarpai nassuiartarlugillu.

Nivi Rosinngillu qularinngilaa nunatsinni inersimasut pisinnaatitaaffiit aallunnerusariaqagaat sumut attuumassuteqarnersut.

AAMMA ATUARUK Kinguaassiutitigut atornerluinerit: Danmarkimi meeqqat sapaatit-akunneri pingasut iluanni apersorneqartartut

- Meeqqat kannguttaatsuliorfigitinnermut illersorneqarnissaminnut pisinnaatitaaffeqarput. Tamanna pingaaruteqarluinnarsoraara. Nunatsinni kinguaassiutitigut pinngitsaaliinerpassuit pinerluuteqarnerpassuilluunniit pisarput. Isumaqarpungalu kannguttaatsuliorfigitinnermut illersorneqarnissaminnut pisinnaatitaafigisaat nunatsinni pimoorunneqarnerulertariaqartut, Nivi Rosing oqarpoq.

Meeqqat kisimiissinnaanissartik pisinnaatitaaffigaat

14-inik ukiulik, Minik Olesen, Kangerlussuarmeersoq Nivi Olsenip oqalunnerani sikisarpoq. Inuunermik atukkatigut tunngaviusut  - meeqqanulli tamanut atuuteqqajanngitsut - erseqqissarpai:

- Nerisaqarfigisinnaasaminnik angerlarsimaffeqartariaqarput, Minik Olesen oqarpoq.

Meeqqat nunanit avannarlerneersut, Savalimmiuneersut, Ålandimeersut nunatsinneersullu aalajangersakkami immikkoortut pillugit saqqummiinissaminnut Naalagaaffiit Peqatigiit Københavnimi allaffeqarfianni pingasunngornermi sisamanngornermilu ataatsimeersuarnermi piareersarput.

 

Minik Olesenip pisinnaatitaaffik allarluinnaq pingaartilluinnakkani aamma eqqaavaa, isumaqarporlu tamanna inersimasunit eqqarsaatigineqanngippallaartartoq:

- Kikkulluunniit kisimiissinnaanissaminnut pisinnaatitaaffeqarput. Soorlu (Københavnimi, aaqq.) akunnittarfitsinni amerlangaatsiarpugut, arlariippaaluullutalu inimi ataatsimi najugaqatigeerappugut. Kisimiingaarsinnaanngilagut. Isumaqarpunga kisimiissinnaanissaq ilaannikkut pingaaruteqartaqisoq. Meeqqammi kikkulluunniit aliasukkaangamik kisimiinnissartik pisariaqartittarmassuk, Minik Olesen oqarpoq.

Nivi: Meeqqat pisinnaatitaaffiinik ilisimanninneq pisussaasutut misigisimatitsivoq

Aalajangersagaq Københavnimi ataatsimeersuarnissamut suliarineqarlunilu oqallisigineqartoq, nunani avannarlerni Atlantikullu avannarpasissortaani nunani tamani politikerit pissaaneqartullu meeqqat pisinnaatitaaffiinik nunani tamalaani atuuttuunik paasissutissiinerusalernissaannut eqquutsitsinerusalernissaannullu, kaammattuutaavoq.

Minik Olesenilumi isumaqarpoq, aalajangersagaq aamma ilaqutariinnut, sunngiffimmi ornittakkanut timersoqatigiillu peqatigiiffiinut assigiinngitsunut minnerunngitsumillu atuarfinnut kaammattuutaasoq.

- Meeqqat atuarfiini klasseni tamani ilinniartitsisut atuartullu meeqqat pisinnaatitaaffii ilisimasariaqarpaat, ilinniartitsisunillu aamma ilisimaneqarnerusariaqarput, Minik Olesen oqarpoq.

AAMMA ATUARUK NAKUUSA-mi meeqqat inuusuttuaqqallu ataatsimeersuaqqammertut

Nivi Rosingimi isumaqarpoq, meeqqat pisinnaatitaaffiisa atuartitsissutigineqarnissaannut naapertorneqarnissaannullu akisussaasut inersimasuinnaanngitsut. Meeqqammi pillugit isumaqatigiissummik ilisimanninneq pisussaasutut misigisimatitsimmat.

- Meeqqat pisinnaatitaaffiinik ilisimasalittut inummik meeeqqat pisinnaatitaaffii pillugit ilisimasaqanngitsumik naapitsigaanni inuttaanut oqaluttuarineqarsinnaapput.

Aalajangersagaq nunani avannarlerni ministerinut aammalu Savalimmiunut, Ålandimut nunatsinnullu tunniunneqassaaq.

Taannalu isumaginninnermut naalakkersuisumut, Martha Abelsenimut, Naalagaaffiit Peqatigiit Københavnimi allaffeqarfianni sisamanngornermi tunniunneqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat