Meeqqat Isummersorfianneersut: Inersimasut inoqatinut attaveqaatini ileqqorluttoqartillugu akisussaanerusariaqarput

Nakuusap meeqqanut isummersorfigititaata meeqqat inuunerinnerulernissaannut innersuussutini politikerinut saqqummiuppai.

Politikerit meeqqat nikassarneqartannginnissaat inoqatinullu attaveqaatini ileqqorissaarnerup isumaanik ilisimannittut amerlanerulernissaat qulakkiissavaat.

Tamanna Nakuusap nunatsinni meeqqanut isummersorfigititaata nunatsinni borgmesterinut tallimaasunut Naalakkersuisunullu innersuussutiliarpassuata ilagaat. Naalagaaffiit Peqatigiit meeqqanut ullorititaat npvembarip ulluisa 20-anni malunnartinneqarnerani taamaaliorpoq.

AAMMA ATUARUK Meeqqat isummersorfianneersut: Meeqqat pisinnaatitaaffii kikkulluunniit ilisimasariaqarpaat

Innersuussutiliaata aqqaniliusut ilaat ima oqaasertaqarpoq:

- Inoqatinut attaveqaatit meeqqanit qassinik ukiulinneersunit atorneqarsinnaaneri pisortanit erseqqinnerusumik takusassiarineqartariaqarpoq, kiisalu inoqatinut attaveqaatinik atuinermi qanoq pissuserissaarnissaq paasissutissiissutigineqarnerusariaqarpoq.

Inoqatinut attaveqaatini ileqqorissaarneq atuarfinni ilinniartitsissutigineqarluarnerulernissaa meeqqanut isummersorfigititap kajumissaarutigaa. Inoqatinullu attaveqaatini paasissutissat kalaallisoortut amerlineqarnissaat aamma kajumissaarutigaat.

Inersimasut maligassiuisuussasut

Nunatsinni meeqqat isummersorfianneersut nittartakkakkut attaveqaatitigut novembarip ulluisa tallimaanni ataatsimeersuarnerminni innersuussutiliorput.

Naalagaaffiit Peqatigiit meeqqat pillugit isumaqatigiissutaat ukiunik 31-nik 2020-mi nalliuttorsiorpoq
Naalagaaffiit Peqatigiit meeqqat pillugit isumaqatigiissutaat - meeqqat inuusuttuaqqallu 18-it inorlugit ukiullit pisinnaatitaaffii pillugit 54-inik immikkoortulik - 1989-imi akuerineqarpoq.

Meeqqat pillugit isumaqatigiissummi ilaatigut ima allassimasoqarpoq:

- Inersimasut iliuuserisaat meeqqanut sapinngisamik iluaqutaassappput (immikkoortoq 3) 

- Akeqanngitsumik atuartuusinnaatitaaneq (immikkoortoq 28)

- Sunngiffeqarsinnaatitaaneq pinnguarnissamullu piffissaqartitaaneq (immikkoortoq 31)

- Kinguaassiuutitigut atornerlunneqarnermut illersorneqarsinnaatitaaneq (immikkoortoq 34)

- Meeqqat sumiginnarneqarsimasut, atornerlunneqarsimasut naalliutsitaasimasullu naalagaaffimmit ikiorneqassapput (immikkoortoq 39)

Tusarfik: Naalagaaffiit Peqatigiit meeqqat pillugit isumaqatigiissutaat

Meeqqat inoqatinut attaveqaatini ileqqorissaarnermut tunngasunik innersuussutiliuinnaratik, nikassaasoqartarunnaarnissaannut imartuunik aamma innersuussutiliorput.

Meeqqammi inersimasunit iliuuseqarfigineqanngitsunik nikassarneqarnermik misigisaqarsimasut amerlavallaartut, meeqqat isummersorfii isumaqarput.

Taamaammat inersimasut tamatumani akisussaanerulertariaqarput.

– Nikassaasarneq sammineqarnerusariaqarlunilu innuttaasut akornanni eqqartorneqarnerusariaqarpoq. Tamanna ilaatigut atuarfinni inoqatinullu attaveqaatitigut aaqqissuussinikkut ingerlanneqarsinnaakutsoorpoq. Inersimasut tamanna piviusunngortissinnaallugulu maligassiuisuusinnaapput, innersuussutit ilaanni allaqqavoq.

Ingammillu atuarfiit tamatumani pingaaruteqartut, meeqqat isummersorfii isumaqarput. Nikassaaneq meeqqamut qanoq sunniuteqartarnersoq, atuartut tamarmik eqqartornerusariaqarpaat.

Minnerunngitsumillu kulturitsinnut tunngasunik aaqqissuussisoqarnerusalernissaa, Nakuusap meeqqanut isummersorfigititaata kissaatigaa. 

- Aaqqissuussinerit meeqqanut tulluuttut kalaallit kulturiannut tunngasut amerlanerusariaqarput. Soorlu kalaallit kulturiat pillugu festivali, oqalugiarnerit, filmertitsinerit, suliniutit il.il., innersuussutit ilaanni allaqqavoq.

Aalajangersagaq innersuussutertalik tamaat Nakuusap nittartagaani atuarsinnaavat.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat