Assi: Jessen Amalie

Kommune Kujalleq: Meeqqat isumaginninnermi suliani najorteqarsinnaatitaassapput

Kommune Kujalleq Peqatigiiffillu Kalaallit Meerartaat meeqqanut najorteqartitsinissamut aaqqissuussinermut ukiunut pingasunut isumaqatigiissuteqarput.

Tassa imaappoq kommunip najorteqarnissamut aaqqissuussineq aningaasanik tapersissallugu pisussaaffigaa meeqqanullu oqaloqatigiittarfimmik piareersimasuutitaqassalluni.

Kommune Kujallermi isumaginninnermut ataatsimiititaliami siulittaasoq, Mari S. Abelsen tusagassiuutinut nalunaarummi oqarpoq:

“Peqatigiiffik Kalaallit Meerartaannut isumaqatigiissutigisarput - kommunitsinni meeqqanut isumaqartorujussuaq pingaartorujussuuvoq. Taanna meeqqat sanngiinnerpaaffianniinneranni tasiuisutut issaaq.”

Kommune Kujalleq nunatsinni kommuninit Peqatigiiffik Kalaallit Meerartaannut isumaqatigiissuteqartuni tulliuvoq, peqatigiiffiullu kommunit amerlanerusut isumaqatigiissuteqarfiginerat nuannaarutigaa.

“ Kalaallit Nunaanni meeqqat tamarmik najorteqarsinnaanissaat anguniagaraarput. Kommune Kujallermut isumaqatigiissuteqarnitsigut siuariarpugut.” Nike Berthelsen tusagassiuutinut nalunaarummi taama oqarpoq.

Ilulissani, Aasianni, Maniitsumi, Nuummi Qaqortumilu najorti sulisarpoq.

Najorti 2019-ip ingerlanerani Nunatta sinneranut siaruarneqassaaq.

Peqatigiiffik Kalaallit Meerartaata oqarnera naapertorlugu Nunatsinni meeqqat inuusuttullu 700-it missaanniittut angerlarsimaffiup avataanut inissinneqaqqanerat pissutigalugu najorteqartitsisarnissamik suliaqarneq aallartinneqarpoq. Inissinneqarsimasut amerlasuut pisinnaatitaaffimminnik ilisimanninngillat imminullu tunngatillugu suliamut akuutinneqartaratik.

Tamanna tunngavigalugu Peqatigiiffik Kalaallit Meerartaat Nunatsinnilu Meeqqat pisinnaatitaaffii pillugit sullissivik MIO meeqqanut inuusuttunullu najortimik aaqqissuussisoqarnissamik ineriartortitsinissamillu 2014-imi aalajangiipput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat