Meeqqat inuusuttullu qanoq imertigaat?

Meeqqat inuusuttullu quliniit 17-it tikillugit ukiullit Qeqqata Kommuniani immersugassanik tunineqassapput. Akissutit atorlugit takuneqarsinnaalissaaq meeqqat inuusuttullu imigassaq, ikiaroornartoq aningaasanoorutillu pillugit qanoq ilisimaqartiginersut.

Qeqqata Kommuniani ilaqutariinnermut immikkoortoqarfik misissuinermik ingerlatsiniarpoq tamatumalu kingorna isumasioqatigiittoqassaaq taannalu decemberip 17-at 18-iallu Knud Rasmussenip Højskoleani ingerlanneqassaaq.

- Meeqqat ilisimasaannik misissuinerup isumasioqatigiisitsinerullu anguniagaraa, meerartatta imigassartorneq, ikiaroortarneq aningaasanoorajunnerullu annikillisarnissaanut sunneeqataasinnaanerannut iliuusissanik aallartisaanissaq, Ilaqutariinnut kiffartuussivimmit Dorthe Margrethe Møller nassuiaavoq.

Siunissaq ungasinnerusoq eqqarsaatigalugu kommuunip anguniarpaa meeqqat inuusuttullu akornanni oqallinnerulernissaq, tassanilu meeqqat inuusuttullu ajornartorsiutit pineqartut pillugit ilisimasallit qaaqqusinnaassavaat.

Meeqqat inuusuttullu qulit 17-illu ukiullit akornanni imigassamik ikiaroornartumillu ajornartorsiutillit politiit sulineranni qujanartumik qaqutiguinnaq siumorneqartarput.

- Qaqutigoortorujussuuvoq meeqqat inuusuttuaqqallu imigassamik ikiaroornartumilluunnit sunnertissimasut siumortarnerat politiassistent Johan Frederik Kreutzmann KNR-imut oqaluttuarpoq.

Namminersorlutik Oqartussat misissuinissamut isumasioqatigiinnissamullu aningaasaleeqataapput.