Meeqqat inuusuttullu pisinnaatitaaffiit ilisimarpianngilaat

Meeqqat inuusuttullu pisinnaatitaaffiit pillugit qaammarsagaanerat ilorraap tungaanut ingerlanngilaq.

Meeqqat 6.-10. klassini atuartut 16 procentiinnaasa inuit pisinnaatitaaffiisa aamma FN-ip meeqqat pillugit isumaqatigiissutaa ilisimavaat.

Meeqqat pisinnaatitaaffimminnut ilisimasallit 2014-imi 38 procentiupput, appariaateqarnerlu iliuuseqarfigineqartariaqartoq, Nakuusami suliniummut aqutsisoq isumaqarpoq.

- Taassuma ersersippaa meeqqat pisinnaatitaaffiisa ilisimaneqarnerulernissanik suliassaqartugut annertuumik. Ukiullu tulliuttut taakku suliarissallutigit, Nakuusami suliniummut aqutsisoq, Mia Skifte Lynge oqarpoq.

AAMMA ATUARUK Sisimiuni atuarfiit pisinnaatitaaffinnik tunngavillit: Meeqqat pisinnaatitaaffitik ilikkarlisigit

Nuummi Atuarfik Hans Lyngemi ilinniartitsisoq, Najaaraq Møller, Nakuusami suliniummut siusinnerusukkut aqutsisuuvoq.

Taassuma Nakuusamiikkallarami meeqqat atuarfianni ilinniartitsisut meeqqat pisinnaatitaaffiit pillugit ilinniartitsinissaannut pikkorissartarsimavai.

Atuarfimmiilu sulisut ataasiakkaarlutik pikkorissariartarput, pikkorissareerlutilli uteraangamik ilikkakkaminnik Najaaraq Møller oqarnera naapertorlugu tamakkiisumik ingerlatitseqqiisarsimanngillat.

- Nakuusamiikkallarama ilinniartitsisut pikkorissartarnikuuakka. Massakkut malunnartorujussuuvoq ulluinnarsiutigineqanngitsorujussuusut meeqqat pisinnaatitaaffii. Paasinartorujussuuvoq ataasiinnaq pikkorissarneqaraangat, suleqatinut ingerlatitseqqiinissaq ajornarsimassasoq.

Pisinnaatitaaffiit atuartitsissutigineqarnerullik

Naajaraq Møller taama oqarpoq. Taassuma atuartitsinermi meeqqat pisinnaatitaaffiisa ilinniartitsissutigineqartarnissaat pingaaruteqartoq oqaatigaa.

- Ulluinnarni ilinniartitsisutut sulineq imartoorujorujussuuvoq. Fagit assigiinngitsut ilinniartitsissutigisarpagut, taava inuttut inerikkiartornermi meeqqat pisinnaatitaaffii sammisarpakka taavalu massakkut ulluinnarsiutigerrapparput meeqqat atuarfiini, atuartut akornanni pimmatiginnittoqarsimatillugu klassiimmut tamarmik oqaluuttarpakka meeqqat pisinnaatitaaffii pillugit, Nakuusami aqutsisuusimasoq ullumikkullu ilinniartitsisutut atorfilik, Najaaraq Møller oqarpoq.

Nakuusap meeqqat pisinnaatitaaffiisa ilisimaneqarnerulernissaa anguniarlugu paasititsiniaanerni meeqqat isummersorfii suleqatiginiarai, Mia Skifte Lynge KNR-imut oqarpoq.

Naalagaaffiit peqatigiivisa Meeqqat pillugit Isumaqatigiissutaa naalisagaq uani atuarsinnaavat