Nalunaarusiaq: Meeqqat inuusuttullu pillugit suliat 900-t kukkuneqanngikkunik amigaateqartut

Naatsorsuuserisummi Deloittemeersut nalunaarusiaanni atuarneqarsinnaavoq meeqqat inuusuttullu pillugit suliat 1200-t missaanniittut akornanni 900-t missaanniittut kukkuneqanngikkunik annertuumik amigaateqartut.

Kommuneqarfik Sermersuumi Meeqqanut Ilaqutariinnullu Ataatsimiititap oqaluuserisassaanni ima ilaatigut allassimavoq:

- Kommuneqarfik Sermersuumi meeqqanut inuusuttuaqqanullu suliassat suliarineqartut 1.200 missaanniittut naatsorsuutigineqarpoq aammalu suliassat suliarineqartut 75 procentiisa missaat amigaateqarlutilluunniit annertuumik kukkuneqartut. Tassa imaappoq suliassat 900-t missaanniittut annertuumik amigaatillit kukkunillillu iluarsaanneqarnissaannut pisariaqartitsisoqarpoq.

AAMMA ATUARUK Suliat meeqqanut tunngasut 1200-t ukiorpassuit suliassaapput

Meeqqat inuusuttuaqqallu pillugit suliat marsip aallartisimalaarnerani sukumiisumik misissuiffigineqarmata suliat 800-t matuneqarput, suliat pineqartut suli ingerlanneqartutut allattorsimammata. Tamannalu kukkuneruvoq.

Suliat sinneruttut taava 1200-t missaanniipput, Deloittellu misissuinerata maanna tassa aamma takutippaa taakkunannga 900-t missaat, imaluunniit 75 procentiisa missaat kukuneqanngikkunik annertuumik amigaateqartut.

AAMMA ATUARUK Sermersuumi meeqqat pillugit suliat 800-it naammassineqartut