Meeqqat inuusuttullu pillugit iliuusissat aallartisarneqaleruttorput
- Iliuusissatut pilersaarut piviusunngortinneqassappat isumaginninnermik suliallit qanimut suleqatiginissaat pingaaruteqarluinnarpoq. Nuannaarutigingaarparalu
Kommunini misilittakkat aallaavigalugit suleqatigiinneq iluatsittussatut isikkoqarmat, Maliina Abelsen oqarpoq.
Naalakkersuisut 2010-mi iliuusissatut pilersaarutaat 25 millionit koruuninik naleqarpoq. Aningaasallu atorluarnerisigut angusaqarluarsinnaallutik, Maliina Abelsen isumaqarpoq.
- Aningaasanik qanorsuaq atuisoqarsinnaavoq kinguneqanngitsumillu. Tassami 100 millionit atorsinnaavagut pilersaarusiugaanngitsumik anginerusumillu kinguneqanngitsumik. Unali pingaarnerpaavoq apeqqusissallugu aningaasat sumut atorneqarnersut, tassami pilersaarusiorluakkamik kinguneqartumillu atuineq akilersinnaajuaannarmat, Maliina Abelsen oqarpoq.
Maliina Abelsenip meeqqat inuusuttullu pillugit suliniaqatigiit politikkimut attuumassuteqanngitsut, soorlu Nanu børn, Tasiorta, Sorlak assigisaallu ilisimasanik paarlaaseqatigiinnikkut suleqatiginerulernissaat anguniarpaa.
