Meeqqat inuusuttullu peqqissusaat pillugu nalunaarut saqqummilerpoq

WHO-p nalunaarusiaa taaguuteqarpoq; ”Inuusuttut akornanni peqqissutsit assigiinnginnerat”, kalaallillu meeqqat atuarfianni atuartut peqqissusaat, nunani assigiinngitsuni 40-ni atuartut peqqissusaannut naleqqiullugit nalilersorneqarlutik. Naalagaaffiit Peqatigiit ukiut sisamakkaarlugit taama ittumik nalunaarusiortarput.

Ajunngitsortai siulliukkutsigit oqaatigisinnaavarput kalaallit atuartut allanut sanilliullugit atuarnerminnik iluarinninnerupput, meeqqallu atuarnerminnik nuannarinnittut amerliartorlutik. Meeqqat atuartut ikittuinnaat atuarnissaminnut tatisimaneqartutut misigisimapput. Ajunngitsunullu ilanngullugu oqaatigineqarsinnaavoq meeqqat pissarissaarnerit pissarissaarpallaanngitsullu atuarfimminni pissarsiaat assigiinngissuteqanngimmata. Kalaallit meerartaasa timersornerunernut ilaanerat aamma utsarluarnartunut ilaavoq.

Kalaallit inuusuttaasa peqqippalaanngitsutut imminnut isiginerat nuannerpallaanngitsunut ilaavoq. Qinngasaarisarnerillu eqqaassagaanni nunarpassuit akornanni qinngasaariffigineqarnerpaat sisamaattut Kalaallit Nunaat inissinneqarsimavoq. Kalaallit meerartaat aamma, sodavandisornerujussuup kinguneranik puallariartornerat, ullormullu marloriarlutik kigutiminnik saliinngitsoortarnerat nuannerpaallaanngitsunut ilaapput, kiisalu kalaaliaqqat 13-it 15-illu akornanni ukiullit pujortarajunnersaallutik.

Nalunaarusiamilu kinguaassiuutinut tunngasortaani kalaallit nukappiaqqaat 15-inik ukiullit allamiunut sanilliullugit atoqateqakulanerupput.

Nakorsaq ilisimatusartorlu, Birgitte Niclasen Kalaallit Nunaanni paasissutissanik suliarinnittuusimavoq.

WHO-miit nalunaaruaq unnugu Radioaviisimi sammeqqikkumaarparput.