Meeqqat inuusuttullu peqatigiiffiliorniarput

Meeqqat siunissarigivut qulequtsiullugu, inuiaqatigiinnilu nukissaqarluartut atorluarusullugit, kiisalu pisortat kisiisa utaqqiinnartariaqannginnerat timitalerusullugu, Qaqortup Kommuniani meeqqat inuusuttuaqqallu ilorrisimaarnissaannik suliniuteqartussamik peqatigiiffimmik pilersitsisoqarnialerpoq.

Meeqqat inuusuttullu ilorrisimaarlutik, inuunerminnilu akisussaassuseqarlutik kiisalu inuiaqataanerminni peqataanissaat nukittorsarniarlugu, peqatigiiffimmik ilaatigut meeqqat inuusuttullu akisussaaqataaffigisassaannik illumik pilersitsinissamik suliniuteqartussaq peqatigiiffik pilersinniarlugu Qaqortup kommunia aallarnisaasutut innuttaasunik aggersaavoq.

- Meeqqat inuusuttullu ajunngitsumik inuuneqarnissaannut peqatigiiffik nukittorsaasussatut pilersikkusupparput. Meeqqat inuusuttullu inuunerminni akisussaassusermik kiisalu inuiaqatigiinni pisunut eqeersimaarnissaminnut periarfissaqaqqullugit. Kommunitsinni meeqqat kikkulluunniit tassani eqqarsaatigineqarput, tassa imaanngitsoq peqatigiiffinngortussap meeqqat paarinerlutat kisiisa sammissagai, Isumaginninnermi Pisortaq Helga Rask Jensen oqarpoq nangillunilu:

- Tassa peqatigiiffiliorusuppugut, meeqqanut inuusuttunullu sammisunik susassaqartitsinernik suliniuteqartartussamik. Suliassat assigiinngitsorpassuusinnaapput,- asiartitsinerniit sunngiffimmi sammisassaqartitsinernut assigiinngitsunut kiisalu meeqqat inuusuttullu illussaannik pilersitsinermut, atuisussat namminneq peqataaffigilluinnagassaannik.

Aperineqaramilu sooq peqatigiiffimmik pilersitsiniarnersut, Helga Rask Jensen oqarpoq, isumaqaramik inoqartoq taama sulinissaminnut nukissaqarluartunik kiisalu pisortat kisimik suliniuteqarnissaat kisiat utaqqissallugu pisariaqanngitsoq.

- Aamma imaassinnaavoq angajoqqaat, aanaa aataakkkut, atsat, angat allallu isumaqartut maani kommunitsinni meeqqanut inuusuttunullu arlaatigut iliuuseqartoqartariaqartoq.

Speak:

Qaqortup kommuniani isumaginnittoqarfiup pisortaata, Helga Rask Jensenip ilanngullugu oqaatigaa kommunip ilaqutariinnut, meeqqanut inuusuttunullu politikkiata ilaatigut peqatigiiffimmik pilersitsinikkut timitalerniarneqartoq. Peqatigiiffik aallartikkuni nammineq ingerlalissaaq.

Peqatigiiffimmik aallartitsiniarneq Qaqortumi Neriusaami aqagu pingasunngornermi unnukkut ingerlanneqassaaq.