Misiligutaasumik inunnik isumaginninnermik taamatut misiligutaasumik suliniuteqarneq, ukiuni pingasuni ingerlanneqareersoq nersualaarneqaqisoq, Aningaasaateqarfimmit 'Ejner og Meta Thorsens Fond'-imit 200.000 koruuninik tapiiffigineqarpoq. Aningaasaateqarfiup qinnuteqarfigineqarsinnaanngitsup, meeqqanik inuusuttunillu atugarliortunik sullissineq taamaattoq tapersersorniarlugu aalajangersimavoq.
Aningaasaateqarfik ukiorpassuarni Nuummut Nunatsinnullu attuumassuteqartoq, suliffeqarfimmut Monberg & Thorsenimut piginneqataasup aappaanit, tassa Ejner Thorsenimit nulianillu Meta-mit aallaaveqarpoq.
Mælkebøttenimut pisortap Kirsten Ørgaardip naatsorsuutiginngisaminnik tapiiffigineqarnertik nuannaarutigeqaa.
- Tapiissutit Nuummi meerarpassuarnut inuusuttorpassuarnullu iluaqutaassapput, taamatullu taperserneqarneq meeqqanik inuusuttunillu atugarliortunik sullissinissamut nukissanik tunisivoq, Kirsten Ørgaard oqarpoq.