Meeqqat inuusuttullu Nuummiut filmeqattaartussanngorput
Filmit assigiinngitsorpassuit nunarsuatsinnit tamarmeersut Katuap filmertarfiani takutinneqassapput.
Filmit pingasunik ukiulinniit 19-inut ukiulinnut naleqquttuupput. Filmit ulluunerani akeqanngitsumik takutinneqartassapput, taamaalilluni meeqqeriviit, atuarfiit, atuareernermi ornittakkat klubbillu filmeriartitsinissaminnut periarfissaqarniassammata - taamaattorli aamma allat filmeriarsinnaasut aaqqissuisunit oqaatigineqarpoq.
Filmit Hollandimeersut, Indiameersut, Danmarkimeersut, Tysklandimeersut, Estlandimeersut, Sverigemeersut, Canadameersut kiisalu Letlandimeersut takutinneqarnissaat pilersaarutaavoq. Filmit nunami filmiliorfigineqartumi oqaatsit atorlugit tuluttullu allagartalersorlugit takutinneqassapput. Taamaattorli atuartunut 7. klassiniit ukiukinnerusunut meeqqerivinniittunullu kalaallisuumut nutserisoqartassaaq.
Filmeriartartut filmertarfinni takuneq ajugaannik filmertitsinissaq aaqqissuussinermi siunertarineqarpoq.
Filmertitsisaqattaarnermik aaqqissuussineq ukiormanna illoqarfinni 14-ini pisussaavoq, taamaalillunilu Nuummi aamma novembarip pingajuanniit tallimaannut ingerlanneqassalluni.