Meeqqat inuusuttullu internettimik atuinerat MIO-p misissuiffigigaa

Nunatsinni meeqqat inuusuttullu internetimik atuisarnerannik suli misissuisoqarnikuunngilaq. Taamaammat meeqqat isummersortarfiat MIO apeqqutinik immersuisitsilluni misissuinermik aallartitsivoq, nunatsinnilu 6.-7. klassini ingerlanneqaleruttorluni.

Inuit attaveqaqatigiittarfii Facebook, Twitter aamma snapchat kalaaliusugut atorluartarivut, MIO-mit oqaatigineqarpoq. Taamaattumik tamakku meeqqanut inuusuttunullu qanoq sunniuteqartarnersut MIO-p paasiniarlugu misissulerpaa.

Inuit attaveqaqatigiittarfii, meeqqat immikkoortitaasartut atuaqatimik, illoqarfigisamik nunaqarfigisamiluunniit avataanni kammalaatitaartorfigisinnaavaat. Meeqqat aamma ikinngutitik qimallugit allamut nuukkaluarunik imaluunniit ilaqutariit avissaaraangata meeqqallu angajoqqaatik marluutillugit ulluinnarni attavigisinnaanngikkunikkik quppernitik aqqutigalugit attaveqarfigisartakkatik pingaarutillit attavigiuaannarsinnaavaat.

Meeqqalli internetimik atuinerat unammillernartortaqarpoq

Misissuinerit MIO-llu SMS-kkut siunnersuisarfianut saaffiginnittarnerit tunngavigalugit ilisimaarivarput, meeqqat arlallit qinngasaarneqartartut ataatsimoornernullu ilaatinneqarneq ajorlutik. Ajoraluartumilli qarasaasiat silarsuaanni qanoq annertutigisumik qinngasaaruttarneq atugaanersoq ilisimanngilarput, taamaattumik MIO-p meeqqanut isummersortarfiata meeqqat qarasaasiat silarsuaaanni qinngasaarisarnermut misigisartagaat apersuutigai.
Taamaattumik  misissuineq maanna atuarfinnut ulluni makkunani nassiussuunneqartoq 6.-7. klassemi atuartunit ilinniartitsisunillu tapersersorluarneqarumaartoq  isummersorfiup neriuutigaa.