Meeqqat inuusuttullu imigassartortarnerat ajornartorsiutaajartuinnarpoq

Meerartaajaartarnerit, imerajoqataanerit, inuttut ajornartorsiornerit allallu Ilulissani inuusuttuaqqat ajornartorsiutaat ikiliartuinnavipput. Suliniutit nangillugit meeqqanik inuusuttunillu ukiaru katsorsaasoqassaaq.

- Kisitsisit qujanartumik maannakkut appariartorput, soorlu meeqqat inuusuttuaqqallu pinerlunneri ikilisorujussuupput. Nalunngikkaangatsigu imigassartornermik annertuumik aaqqissuisoqarniartoq miljøarbejderit aqqusinikkut angalaartarput, imerpallaarsimasullu politiit suleqatigalugit ikiortarlugit. Ikiliartortorujussuupput qujanartumik, Ilulissani pinaveersaartitsinermut siunnersorti Helga Nielsen oqarpoq.

Taamaammat aamma meeqqanik inuusuttunillu katsorsaariaatsimik TAPP-mik taasamik misiliillutik Ilulissani ukiaru pikkorissartitsiniarput. Angajoqqaat, atuarfiit, politiit, miljøarbejderit isumaginninnermillu siunnersortit suleqatigiillutik ingerlatissavaat.

- Inuusuttut immikkut pisariaqartitsisut, soorlu ikiaroornartumik, imigassamik angerlarsimaffimminniluunniit ajornartorsiuteqartut oqaloqateqarnissamik ikiorneqarnissamillu neqeroorfigineqassapput, Helga Nielsen oqarpoq.

Peqataasussat katsorsartinnerminni ingerlariaqqinnissaminnut atugassaminnik ulluni 14-ini tuniorarneqassapput. Misiligutaavoq, alkologi suleqatigineqassalluni. Iluatsissappallu ataavartunngortinniarlugu kommunalbestyrelsemut ingerlateqqinneqassaaq.

Qaasuitsup kommunea arfineq-pingasunik illoqarfeqarpoq 32-inillu nunaqarfeqarluni.

- Psykologit oqaloqateqartartullu allat ikiuigasuarsinnaasut pilersinneqassapput. Suliniutillu siornatigut iluatsinnikut, assersuutigalugu Aasianni Qeqertarsuarmilu kinguaassiuutitigut atornerlunneqarsimasunik katsorsaanerit pikkoriffigilikkat, atorluarneqassapput. Ilulissani nunaqarfinnilu suliniutit suut iluatsissimanersut suullu pisariaqartinneqarnersut aallaavigalugit sinerissami suliniutissat piareersarneqassapput.

Helga Nielsenip assersuutigaa Familiehøjskoleqartitsisarneq namminneq Ilulissani nunaqarfiinilu misilittagaqarfigillualigartik. Meeqqanik inuusuttunillu katsorsaaneq septembarimi ingerlanneqartussaq Nuna Fondimit aningaasaliiffigineqarpoq.