Meeqqat inuusuttullu allallutik titartaallutillu ilaqutariinni aliasunneq oqaluttuaraat
Siunnersuutit katillugit 30-t meeqqanit inuusuttunillu nassiunneqarsimapput, maannalu arfineq-marluk ajugaasutut toqqarneqarlutik. Siunnersuutit sumiiffinnit assigiinngitsuneersuupput, ingammillu nunaqarfimmiut nassiussuisimaqalutik.
”Uatsinnut assut nuannerpoq taamak amerlatigisut peqataasimammata, tassami sammisaq oqaluuserissallugu sapernarsinnaammat, ingammillu Kalaallit Nunaanni sumiiffinnit tamanit oqariartuutitta tusarneqarsimanera paasi llugu nuannerpoq", Meeqqat Illersuisuat Aaja Chemnitz Larsen oqarpoq.
Meeqqat titartaaqquneqarsimapput imaluunniit oqaluttualioqquneqarlutik. Annerit qinnuigineqarsimapput ilaqutariit imminortoqarfiusimasut pillugit allaaserisaqaqqullugit, minnerit akulliilllu qinnuigineqarsimallutik avinneq pillugu allaaserisaqaqqullugit.
Suliamik ingerlataqartoq Aviaja Rohmann Pedersen siunnersuutit pitsaassusaat nuannaarutigaa. ”Malunnarpoq klassit suliassaq pimoorussimagaat aammalu ataatsimut eqqartuiffigisarsimagaat. Alla takusinnaasarput tassaavoq meeqqat ilaasa angerlarsimaffimminni ajornartorsioraangamik atuarfimminni isumassuisunik soorlu isumaginninnermut siunnersortinik imaluunniiit skolefemik tapersersorneqartarnertik iluaqutigisaraat”, Aviaja Rohmann Pedersen oqarpoq.
Ajugaasut toqqarlugit saaffigineqareerput pisisinnaanermullu allagartamik tunineqarsimallutik klassit ataatsimoorlutik atorsinnaasaannik. Ajugaasut uanngaanneerput: Kangerlussuaq, Isortoq, Kangaatsiaq, Nanortalik aamma Nuuk. Ukiaru ajugaassutaasut saqqummersinneqarumaarput, meeqqat pillugit meeqqanit meeqqanut inersimasunullu meeqqanik sullissisunut allanullu inersimasunut innersuussutitut.