- Meeqqat tungaanninngaanniit akissarsiffiup nalaani angajoqqaat meeqqaminnik paarsisinnaanngippata qimarngueqarnissaa kissaataavoq annertooq. Meeqqat sumiiffimmut inersimasumik oqaloqateqarfigisinnaasaminnik qimarnguigisinnaasaminnillu peqarnissaa kissaatigaat, isumaginninnermut naalakkersuisoq, Martha Abelsen (S) oqarpoq.Assi: Naalakkersuisut

Meeqqat inuusuttullu akissarsiffiup nalaani tallimanik ornittagartaalersut

Meeqqat siunnersuisoqatigiivisa Nakuusap unnukkut sapaatillu-akunnerisa naanerani ornittagaqalernissaanut periarfissat siusinnerusukkut tapersersimavai, nunatsinnilu kommunini tallimani misiliummik aaqqiissut ukiuni pingasuni atuuttussaq pilersinneqarpoq.

Meeqqat amerlavallaarujussuartut kinguaassiutitigut kanngutsaatsiorfigineqarneq, sumiginnagaaneq allatigulluunniit paarinerlugaaneq angajoqqaamini aalakoorneranni nalaattarpaat.

Taamaammat Naalakkersuisut kommunillu nunatsinni kommunini tallimani ornittakkanik pilersitsillutik misiliummik aallartitsipput, taakku akissarsiffiit nalaanni unnukkut unnuamilu ammasassapput.

- Meeqqat tungaanninngaanniit akissarsiffiup nalaani angajoqqaat meeqqaminnik paarsisinnaanngippata qimarngueqarnissaa kissaataavoq annertooq. Meeqqat sumiiffimmut inersimasumik oqaloqateqarfigisinnaasaminnik qimarnguigisinnaasaminnillu peqarnissaa kissaatigaat, isumaginninnermut naalakkersuisoq, Martha Abelsen (S) oqarpoq.

Ornittakkat Aasianni, Ilulissani, Sisimiuni, Nanortalimmi Nuummilu oktobarip ingerlanerani pilersinneqassapput, misiliutimillu aaqqiissuteqarneq maanna 2023-p naanissaanut atuukkallassaaq.

AAMMA ATUARUK Astrid Krag isumaginninnermi suliniutit pillugit: Iliuutsivut naammassimanngillat

Ornittakkat qanoq ilusilerneqassanersut kommunit ataasiakkaat aalajangissavaat, suliassanulli taakkununnga inersimasunik marlunnik ikinnerpaamik sulisoqarnissaa Naalakkersuisunit piumasaqaataavoq.

Martha Abelsenip sumiiffiit taakku isumaginninnermi suliaqarfiunavianngitsut erseqqissaatigaa. Tamanna isumaginnittoqarfimmi suli suliarineqartassaaq.

Suliniummut 8 millionit koruunit

Ornittanut 8 millionit koruunit immikkoortinneqartut, kommunilli suliniut annertuserusukkunikku iliuuseqarsinnaapput.

Martha Abelsenip aaqqiissuteqarneq 2023-mi decembarinngorpat toqqissisimanerulernermik pilersitsisimanissaa neriuutigilluinnarpaa.

AAMMA ATUARUK Ataatsimut isigalugu: Meeqqanut inuusuttunullu atugarliortunut atatillugu innersuussutit 16-it

- Tassa meeqqat pisariaqartitaminnik – aamma piffinni angajoqqaat toqqissisimanermik tunniussisinnaanngiffianni saaffissaqarsinnaanissaat toqqisisimaffissaqarsinnaanissaallu, isumaginninnermut naalakkersuisoq, Martha Abelsen oqarpoq.

Martha Abelsenip danskillu isumaginninnermut ministeriata, Astrid Kragip nunatta Danmarkillu meeqqanut atugarliortunut atatillugu suleqatigiinnerulernerannit ornikkattanik pilersitsinissaq innersuussutinut 16-inut ilaavoq.

AAMMA ATUARUK Inuusuttoq Nakuusami suleqataasoq: Isumaginninnermut innersuussutit pingaarnerit ukuupput

Innersuussuteqarnermullu atatillugu meeqqat siunnersuisooqatigiivisa Nakuusap suliniut taanna pingaarnerpaanut ilaanerarpaa.

Nunatsinni meeqqanut inuusuttunullu atugarliortunut suliniuteqarnerulernissap pisariaqartinneranik misissuinermi nalunaarusiortoqarnerani innersuussuteqartoqarpoq.

Ornittarfinnik aaqqiissutitut misiliuteqarneq taamaalilluni innersuussutinit 16-init piviusunngortunit siulliuvoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat