Meeqqat inuusuttullu ajunngitsumik pineqarnissaat nakorsamit ujartorneqarpoq

Rune Jakobsenip apriilimi Nanortalimmi kommunalbestyrelse politiinut tunniukkaluarpaa, poltiinillu suliaq unitsiinnarneqartariaqarsimavoq. - Inatsisip naammassillugu suliarineqarsimannginnera eqqumaffigisimanngilara. Pinerluuteqarsimanermut inatsit malillugu allaqqagaluarpoq pineqaatissiisoqarsinnaasoq, kisiannili qanoq annertutigisumik pineqaatissiisoqarnissaanik aalajangersaasoqarsimanngilaq. Tassalu eqqartuussivikkut ingerlatsigaluaraanni kinguneqartitsisoqarsinnaanngilaq, Rune Jacobsen oqarpoq nangillunilu:

- Pinerluuteqartoqarsimanera qularineqanngikkaluarpoq, inatsilluuna naammassillugu suliarineqarsimanngitsoq. Ajuusarnartualu uaniippoq, suliat pineqartut suli naammassineqanngimmata, qangali naammassillugit suliarineqarsimasinnaagaluarput, pisut nuanniitsut unitsinniarlugit. Kingunerisinnaavai, assersuutigalugu meeraq ukioq sinnerlugu atuarsimanngitsoq ilinniagaqarnissaminut suliffittaarnissaminullu periarfissaqarnavianngmmat. Meeqqat paarinerlunneqartut inerikkiartornerminni paarinerlugaanertik ajoqutigissavaat, inersimasunngornerminnilu imminnut napatinniarnissaminnut aamma ajornartorsiulissallutik. Atuanngiffik naappat ikiortarialik alla aamma aallartissaaq, ikiorneqanngikkunilu ajornartorsiortuassaaq, Rune Jacobsen oqarpoq.

Rune Jacobsenip naluaa sooq tamaanga killittoqartariaqarnersoq, ilimaginerarpaali sullissinikkut periarfissakilliornerup tamanna kingunerigaa, kialuunniit piiaraluni taamaaliornissani siunertarinavianngimmagu.

- Suliaq sivisullunilu artornarpoq, paasiniagassarli tassaavoq sooq susoqannginnera qulaarniassallugu, qanorlu ingerlariaqqittoqassanersoq paasissallugu. Tassalu qinikkat annertuumik tassani suliassaqarput akisussaaffeqarlutillu. Suliassaq suliarisinnaanngikkunikku paasitittariaqarpaatigut suna ajornartorsiutaanersoq, ingerlaqqittariaqarpugummi, Nanortalimmi nakorsaaneq Rune Jacobsen oqarpoq.

Inatsisartut peqqussutaata 2003-meersup qulakkeerpaa kommunit pisussaaffigigaat, meeqqat inuusuttullu paarinerluneqartut ikiorsissallugit.